O comité da Axencia Europea do Medicamento (EMA, polas súas siglas en inglés) que revisa a seguridade dos fármacos autorizados na Unión Europea concluíu a análise sobre a vacina de Oxford-AstraZeneca contra a COVID-19, a recentemente renomeada como Vaxzevria, centrada en estudar se a aparición de trombos nunhas poucas persoas que a recibiran estaba ou non relacionada coa súa administración. E chegou a dúas conclusións: estes coágulos, que son de seu "pouco comúns", deben pasar a sinalarse como un efecto secundario "moi raro" dunha vacina cuxos beneficios fronte á doenza seguen superando os potenciais riscos.
Tras analizar 86 casos de tromboses entre uns 25 millóns de persoas vacinadas, a Axencia Europea do Medicamento reafirma que "os beneficios da vacina continúan sendo maiores que os riscos para as persoas que a reciben"
O comité centrou a súa análise nunha revisión "profunda" de 86 casos destas tromboses -non todos necesariamente asociados á vacina-, 18 deles con resultado de morte, reportadas na Unión Europea e mais no Reino Unido ata o 22 de marzo. Naquela altura xa recibiran esta vacina uns 25 millóns de persoas. Estes trombos, explican, van asociados a baixos niveis de plaquetas e unha posible explicación é que sexan o resultado dunha "resposta inmune" tras recibir a vacina.
Con estes datos sobre a EMA di ter claro, e por iso o "confirma", que estes trombos son "moi raros" e que, aínda que deben pasar a figurar como efectos secundarios excepcionais, non son motivo para recomendar que a vacina deixe de administrarse. "Os beneficios da vacina continúan sendo maiores que os riscos para as persoas que a reciben" e está acreditado, subliñan, que "é efectiva previndo a COVID-19 e reducindo hospitalizacións e mortes" ligadas á doenza.
Neste escenario, a EMA recomenda á cidadanía que reciba esta vacina que acuda ao médico se, nas semanas seguintes á vacinación, sente síntomas como falta de respiración, dor no peito, dor abdominal persistente, visión borrosa ou dores de cabeza "persistentes". Alén disto, reitera ao persoal sanitario que os devanditos casos de tromboses son "moi raros" e que, aínda que a maioría dos coñecidos se produciron en mulleres menores de 60 anos e nas dúas semanas posteriores á recepción da primeira dose, polo momento "non é posible identificar factores de risco específicos".
A EMA reitera que esta vacina é "efectiva previndo a COVID-19 e reducindo hospitalizacións e mortes" ligadas á doenza. O Consello Interterritorial decidiu que, de agora en diante, se administrará só a maiores de 60
Á luz destas conclusións [o comunicado íntegro da EMA pode lerse nesta ligazón], a EMA sinala que, en calquera caso, queda nas mans dos Estados a posibilidade de modificar ou non cadanseus plans de vacinación. Á procura dunha posición común -a respecto, por exemplo, de indicacións sobre a administración a determinados grupos de idade agora ou no futuro-, os ministros e ministras de Sanidade da Unión Europea manteñen este mesmo mércores un cumio informal ao respecto. Tras o encontro, a ministra de Sanidade española, Carolina Darias, preside a reunión do Consello Interterritorial de Saúde, no que o Ministerio participa xunto ás comunidades autónomas.
A Consellería de Sanidade remitíase este mércores a esa xuntanza do Consello, se ben o seu titular, Julio García Comesaña, subliñaba que ata o mediodía non existira indicación ningunha sobre cambios na administración da vacina de AstraZeneca. Esta vacina é utilizada nas vacinacións masivas que o Sergas está a desenvolver esta semana. No entanto, pasadas as 11 da noite do mércores, a ministra de Sanidade, Carolina Darias, confirmaba que o Consello decidiu que, de agora en diante, está vacina será administrada só a poboación maior de 60 anos.
O Sergas prevera administrala esta semana a unhas 55.000 persoas nadas entre 1956 e 1961. A primeiras horas do luns, Sanidade confirmou a suspensión e "reprogramación" da vacinación á poboación menor de 60 anos, na liña do decidido polo Consello Interterritorial.
Tras esa decisión, este xoves a Comisión de Saúde Pública do propio Consello abordará os seguintes pasos. Entre eles, a decisión sobre ampliar por riba o límite de idade para recibir a vacina de AstraZeneca, ata agora fixado nos 65 anos. Tamén terá que abordar a decisión sobre as segundas doses da poboación menor de 60 que xa recibiu a primeira.
O 89% da poboación maior de 80 xa recibiu cando menos unha dose de vacina
Ata o día 6 foran administradas algo máis de 584.000 doses de vacinas contra a COVID-19 en Galicia, o 74,4% das recibidas
Estas novidades a respecto da vacina de AstraZeneca chegan nunha xornada na que os datos de vacinación reflicten, tamén para Galicia, a aceleración do proceso. Segundo os datos fornecidos polo Ministerio de Sanidade, a 6 de abril, o Sergas administrou 25.708 vacinas nas vinte e catro horas previas e 408.648 persoas recibiran xa algunha dose. Isto implica que a Xunta administrara ata esa xornada o 74,4% das doses recibidas, un total de 584.849, 4,2 puntos por baixo da media estatal.
Por idades, como reflicte o cadro sobre estas liñas, a poboación galega maior de 80 anos que xa recibiu cando menos unha dose chega ao 88,6%, cinco puntos por riba da media estatal. En total, o 17,3% da poboación galega recibiu xa cando menos unha dose, algo máis dun punto por riba do conxunto do Estado.
No que atinxe ás persoas que xa completaron a pauta (polo momento, dúas doses en todas as vacinas dispoñibles), o 39,5% da poboación maior de 80 anos está xa inmunizada en Galicia, mentres que no conxunto do Estado esta proporción chega ao 46,9%. No que atinxe ao total da poboación, en Galicia completou a pauta o 7,5%, dúas décimas máis que na media estatal.
