A segunda volta do estudo estatal constata que apenas o 2% da poboación galega pasou o coronavirus

A segunda volta do estudo de seroprevalencia do Ministerio de Sanidade segue a indicar unha baixa exposición da poboación galega ao virus CC-BY-SA Imaxe: Goberno de Navarra | Montaxe: Praza Pública

A segunda rolda do estudo do Goberno central estima que o 2,2% da poboación galega pasou o coronavirus, arredor de 60.000 persoas

Os resultados da segunda parte do estudo Enecovid de seroprevalencia do coronavirus levado a cabo polo Goberno central insisten nos datos do impacto da Covid-19 en Galicia que ofreceu a primeira vaga. As cifras feitas públicas este xoves, e detalladas logo nun informe máis amplo, estiman que un 2,2% da poboación galega tería sufrido a doenza, unha porcentaxe case idéntica --tan só superior nun 0,1% máis-- aos resultados do primeiro estudo. 

Esta porcentaxe sitúa Galicia por baixo da media estatal (do 5,2%, 0,2 puntos máis que no primeiro estudo) e da incidencia en territorios como Madrid (11,4%), Castilla-La Mancha (10,3%) ou Castilla y León (7,5%), pero tamén con valores máis altos que Murcia (1,6), Asturias (1,6) ou Illes Balears (1,5).

Así, e tendo en conta as estimacións do estudo, algo máis de 59.400 persoas en Galicia tiveron xa contacto co virus, unha cifra un chisco superior á anterior, coa diferenza que desta vez as probas para a detención de anticorpos foron maioritariamente repetidas ás mesmas persoas pero xa non en pleno confinamento, senón durante as primeiras semanas de desescalada (entre o 18 de maio e o 1 de xuño). Con todo, o número é moi escaso no caso de que a inmunidade de grupo siga a ser vista como unha estratexia axeitada. 

Galicia detecta dous de cada dez casos de coronavirus, que provoca a morte dunha persoa de cada cen infectadas, segundo o estudo do Ministerio

Os resultados de seroprevalencia do coronavirus desta segunda fase do estudo estatal volven estar arredor dun punto por baixo dos do levado a cabo polo Sergas, que indicaba que o 1,15% da poboación que tería pasado xa a Covid-19

Xa que logo, e segundo os datos que cada día transmite o Sergas, nesta altura son 11.335 os positivos acumulados e detectados no país, case o 20% dos que apunta o estudo de seroprevalencia. Daquela, Galicia detectaría dous de cada dez casos. 

Por provincias, e segundo esta segunda vaga do estudo do Ministerio de Sanidade, en Lugo teríase contaxiado un 2,5% da poboación da provincia, fronte ao 2,1 que indicou a primeira rolda; en Ourense, un 2,2% (fronte ao 2,6% anterior); na Coruña, un 2,2% (1,8) e en Pontevedra, un 2% (2,5). En todos os casos, as porcentaxes da primeira fase non coinciden exactamente coas facilitadas daquela polos datos preliminares, logo de ser completados ao difundir este segundo informe. 

Por outra banda, a taxa de letalidade, que se sitúa no conxunto de España en arredor do 1%, é en Galicia semellante, ao quedar no 1,03%, porcentaxe case idéntica á da rolda anterior do estudo. Xa que logo, e tendo en conta os datos de contaxiados que se tiran do informe do Goberno central e das cifras medias de falecidos acumulados na altura na que se levaron a cabo as probas, de cada cen persoas infectadas polo virus no país, unha falece. 

Mapa provincial de anticorpos detectados no estudo estatal do coronavirus, elaborado polo Instituto Carlos III CC BY-SA Ministerio de Sanidade

Se tal e como sinala o estudo, contraeu o coronavirus un 2,2% da poboación galega --unhas 59.400 persoas-- e o número de falecidos acumulados durante a etapa na que se realizaron os tests --entre o 18 de maio e o 1 de xuño-- situábase nas 612, a taxa de latalidade é practicamente exacta do 1%, fronte ao 1,74% que se derivaba do estudo levado a cabo pola Xunta

Ademais, no conxunto de España existe un 0,8% de participantes no estudo que sendo negativos en anticorpos na primeira rolda si que deron positivo na presenza destes anticorpos dos que antes carecían. É a denominada taxa de serconversión, que é do 0,5% nas provincias da Coruña, Pontevedra e Ourense e do 0,9% en Pontevedra. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.