Nos últimos anos, a tendencia no número de hectáreas ardidas nos montes galegos é decrecente. O ano 2017, con máis de 50.000 hectáreas arrasadas en apenas dous días de outubro, foi a principal alteración nunha tendencia á baixa que, non obstante, non mudou a política de restricións informativas implantada pola Xunta dende o verán de 2009. Daquela, tras lograr regresar ao poder, o Executivo popular eliminou os partes diarios que daban conta aos medios de comunicación e á sociedade en xeral de todos os incendios e as medicións provisionais da súa superficie afectada.
No verán de 2009, o novo Goberno do PP eliminou os partes diarios que daban conta de todos os incendios
Aqueles partes, que a Consellería do Medio Rural dirixida por Alfredo Suárez Canal (BNG) divulgaba un mínimo de dúas veces ao día, foron substituídos por comunicados puntuais nos que é a propia Xunta a que elixe sobre que incendios informar mediante comunicados puntuais. A política xeral é non dar conta de ningún foco inferior a 20 hectáreas, agás que afecten a espazos protexidos ou próximos a zonas habitadas. A xustificación fora non xerar alarma social cos incendios.
Deste xeito, resulta practicamente imposible obter unha visión global do número total de incendios e a súa superficie mentres se están producindo. O total da superficie ardida cada ano e o número de focos só é coñecido ao ano seguinte, cando a propia Consellería e tamén o Goberno central ofrecen os seus balances finais de cada campaña de incendios.
O incendio de Canibelos (Ourense) xa afectou a unhas 60 hectáreas, segundo Medio Rural
Con estes condicionantes de partida, esta fin de semana Medio Rural dá conta de tres incendios, aínda que bombeiros forestais e fontes presenciais apuntan á existencia doutros, a maioría de menor dimensión. O máis relevante do que informa a Xunta sitúase no termo municipal de Ourense, en Canibelos. Agravado polas altas temperaturas, este foco está activo dende arredor das tres da tarde do sábado, día 18, e nel arderon "unhas 60 hectáreas".
O incendio de Rubiá afectou ao parque natural da Serra da Enciña da Lastra
A Consellería dá tamén conta doutro foco na provincia de Ourense, en Pardollán (Rubiá), declarado durante o mediodía do venres, día 17. Este incendio atinxiu a 41,35 hectáreas, indica Medio Rural, e a súa importancia é maior polo feito de afectar ao parque natural da Serra da Enciña da Lastra. Trinta das hectáreas ardidas eran monte arborado. Foi dado por extinguido no serán do domingo.
O terceiro e último incendio do que a Xunta informa esta fin de semana -cando menos ata o momento- declarouse na tarde do sábado en San Pedro de Muro (Porto do Son) e este domingo xa fora dado por controlado. Afectou a unhas 24 hectáreas, segundo as primeiras medicións, 19 delas arborizadas.
As altas temperaturas e o vento contribuíron a avivar as lapas esta fin de semana. Non en van, a maior parte do territorio de Galicia se atopaba este domingo en risco "extremo de incendios forestais", segundo o índice da propia Consellería do Medio Rural.