Familias dun colexio coruñés denuncian o recorte de persoal de atención á diversidade

CEIP Labaca da Coruña © Igaciencia

Hemeroteca

A Asociación de Nais e Pais do CEIP Labaca, da Coruña, denuncia que o centro non conta neste momento con profesorado especialista de Audición e Linguaxe, unha persoa especialista que prevén e atende ás dificultades de aprendizaxe e desenvolvemento relacionadas coa fala, a linguaxe e a comunicación. Ademais, foilles retirado un auxiliar educativo, profesionais ambos cos que si contaba o curso pasado. As familias lembran que outros centros da Coruña, como o CEIP Rosalía de Castro, atópanse nunha situación semellante. 

Nais e pais denuncian que o centro non conta neste momento con profesorado especialista de Audición e Linguaxe e que foi retirado un dos dous auxiliares educativos

O curso pasado, este centro contaba cunha especialista a tempo completo, que chegou a atender ata a 19 nenos e nenas ofrecendo un total de máis de trinta sesións semanais de cincuenta minutos de atención individualizada. Todo ese alumnado, máis as novas incorporacións deste curso, non está a recibir a atención que precisa para o seu correcto desenvolvemento escolar. 

A asociación subliña que é o segundo ano que se recorta nesta dotación, posto que xa en cursos anteriores o que fora unha praza completa e outra media foran reducida pola Administración a unha única praza, sen que as necesidades se tivesen reducido dun curso cara o outro, senón máis ben o contrario. 

Así mesmo, a asociación salianta que foi suprimido un dos dous auxiliares educativos cos que contaba o curso pasado. O alumnado con necesidades educativas especiais (NEE) que precisa desta atención "queda nunha situación penosa", xa que "unha única persoa ten que asumir o coidado e traslado de nenos e nenas que, pola estrutura do centro se atopan en edificios separados, cando algúns deles precisan acompañamento continuado", explican.

"Ao non dotar dos recursos axeitados para a súa correcta atención educativa a Xunta está, de feito, limitando o seu dereito á educación"

As familias denunciaron xa esta situación ante a Consellería de Educación, pero dez días despois do inicio do curso escolar continúan sen ter novas ao respecto. Nais e pais salientan a súa "preocupación" polas "consecuencias que esta carencia poida ocasionar para todas as crianzas, dado que tampouco se están podendo levar a cabo actividades especializadas de estimulación da linguaxe e prevención de dificultades con todo o alumnado".  

As familias denuncian que estas medidas "supoñen unha grave discriminación cara ao alumnado con NEE, pois ao non dotar dos recursos axeitados para a súa correcta atención educativa a Xunta está, de feito, limitando o seu dereito á educación".

No ano 2017 o TSXG condenou á Xunta a indemnizar unha familia que denunciou que o CEIP Salgado Torres da Coruña incumprira a súa obriga de atender adecuadamente un neno con necesidades educativas especiais. Esther Cuadrado, da Plataforma Galega pola Educación Inclusiva, alertaba nesta entrevista dos problemas que se poden derivar dunha deficiente atención temperá ás persoas con autismo.

 

Ciudadanos reclama a Xunta e Concello solucións para a falta de persoal

O grupo municipal de Ciudadanos uniuse ás críticas á falta de persoal de apoio para alumnado con necesidades específicas nos colexios da cidade. Ciudadanos denuncia que "os recursos son baixos e os recortes prodúcense neste tipo de cuestións" e que cada comezo de curso son as protestas dos pais as que consiguen aumentar o número de persoal de apoio nalgunhas ocasións. 

"Non se pode improvisar cada inicio de curso, por iso desde Cidadáns consideramos urxente o entendemento entre administracións. Non se poden pasar a pelota dun lado a outro. A pouca colaboración institucional non debe ser escusa para desviar problemas", sinala o partido.

Despece

  • Adíase a reforma do colexio María Mariño anunciada pola Xunta tralas denuncias no programa de Chicote

    Entrada ao C.E.E. María Mariño da Coruña © Google Maps

    En xullo, apenas dous meses despois da denuncia televisiva, a Consellería de Educación licitou a construción dun comedor e dunha cociña de seu para o María Mariño

    O pasado mes de maio o Centro de Educación Especial María Mariño da Coruña foi noticia en todo o Estado despois de que o programa ¿Te lo vas a comer? , de Alberto Chicote, denunciase publicamente as deficiencias existente no comedor do centro, entre outras eivas. Este problemas eran, sobre todo, de persoal, pois o centro dipuña dun número reducido de coidadoras que teñen que atender unha media de 10 alumnos e alumnas, en moitos casos con dificultades de mobilidade.

    Tamén se criticaban eivas estruturais no edificio, comezando pola propia carencia dun comedor, o que obrigaba a alumnado e coidadoras a trasladarse todos os días ao do Centro de atención a persoas con discapacidade Santiago Apostol, dependente da Consellería de Política Social.

    En xullo, apenas dous meses despois daquela denuncia, a Consellería de Educación licitou a construción dun comedor e dunha cociña de seu para o María Mariño. Ademais, o proxecto inclúe a reforma dos actuais baños (que tamén foran obxecto das críticas das familias afectadas) e a construción dunha serie de espazos anexos que servirán como almacén ou vestiario. O propio proxecto licitado pola Xunta dá conta do estado "deficiente" do edificio, construído en 1975, e que sofre problemas de humidades.

    A obra está a sufrir un importante atraso, despois de que a empresa á que se lle adxudicara o contrato renunciase á súa execución

    Porén, a obra, que debía estar rematada a finais deste mes de setembro, lista para o inicio do curso, está a sufrir un importante atraso, despois de que a empresa á que se lle adxudicara o contrato renunciase á súa execución. A Consellería de Educación xa procedeu a encargarlle a actuación á segunda oferta con mellor valoración no concurso público. Porén, aínda non se comunicou un prazo para a súa finalización, prevista inicialmente en 45 días de traballos. A Asociación de Nais e Pais do centro sospeita que a renuncia se dbee ao mal estado do edificio. 

    "É incrible que teñamos que saír nos medios para que a Xunta nos escoite", dicía en maio Manoli, unha das nais do alumnado do centro, en conversa con Praza. Iso si, non era optimista sobre o futuro: "Non vai haber cambios. Cando remate todo o ruído este dos medios, todo vai seguir igual". Con todo, deixaba unha porta aberta á esperanza: "O ano que vén hai eleccións autonómicas, igual entón si que nos fan caso".

    "É incrible que teñamos que saír nos medios para que a Xunta nos escoite"

    Ademais das reformas que se están a realizar e cuxas obras está previsto que rematen este outono, as familias con alumnado no centro seguen a esixir máis persoal, sobre todo a presenza dun fisioterapeuta e o acondicionamento dun patio de recreo, pois nestes momentos só contan cun parque de catro metros cadrados. A obra de reforma só prevé a creación dun "pequeno porche cuberto" e "unha saída directa ao exterior".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza