O sindicato SLTA critica que o aumento do gasto das administracións nos contratos de emerxencias aéreas acaba en maiores beneficios das empresas sen melloras para o persoal, como din que sucede en Avincis, antiga Inaer-Babcock
O Sindicato Libre de Traballadores Aéreos (SLTA), maioritario entre as tripulacións de servizos aéreos de emerxencias, convoca folga indefinida desde o 1 de xullo na empresa Avincis, unha das principais do sector en toda España, herdeira da antiga Inaer, mercada no seu día pola multinacional Babcock.
Avincis, que cando era Inaer levaba a inmensa maioría dos contratos do Goberno galego, opera hoxe en Galicia os servizos de salvamento marítimo tanto do Estado como da Xunta e parte dos helicópteros de loita contra incendios.
O SLTA critica que o incremento de gasto das administracións públicas nos servizos de emerxencias aéreas está indo a parar a maiores beneficios das empresas sen que o seu persoal vexa mellorar as súas condicións laborais, "conxeladas" desde hai dez anos. O sindicato di que no caso de Avincis, agora "controlada polo fondo de investimento británico Ancala, optou por unha política de represión interna e provocación constante en lugar de dialogar e mellorar progresivamente as condicións laborais, o que levou ao límite a paciencia destes profesionais".
O sindicato advirte de que "a folga ameaza a dispoñibilidade destes servizos cruciais durante os meses de verán". Unha folga que en Galicia afectaría ao salvamento marítimo tanto estatal como da Xunta e a parte dos helicópteros contra incendios. Os helicópteros de emerxencias sanitarias, pola contra, están en mans doutra empresa, Eliance, á que a Xunta mantén operando o servizo malia rescindirlle o contrato hai semanas polos seus reiterados incumprimentos contractuais.
Pola súa banda, Avincis é herdeira de Inaer, posteriormente Babcock, que vén de ser condenada no denominado cártel do lume, unha trama de varias empresas de servizos aéreos que se repartiu contratos en todo o Estado, tamén en Galicia.
