O presidente da Xunta afirma que "Galicia, e os seus medios, están a disposición para todo no que poidamos axudar"
Galicia lembra a ferida do accidente ferroviario de Angrois e, como xa fixo no caso de Adamuz, volve volcar a súa solidariedade coas vítimas do terrible accidente que tivo lugar na mañá deste mércores á altura de Toledo, cos seus familiares e persoas do seu círculo afectivo.
O presidente da Xunta manifestou o seu "máis sentido pésame polos falecidos; e todo o apoio e cariño ao resto de afectados, familiares e achegados". Alfonso Rueda afirma que "Galicia, e os seus medios, están a disposición para todo no que poidamos axudar".
A Axencia Galega de Emerxencias está en contacto tanto co Goberno de España como co de Castela-A Mancha, segundo informou Rueda. Todas as formacións políticas con representación no país suspenderon as súas axendas públicas para este mércores.
A líder da oposición e portavoz nacional do BNG, Ana Pontón, trasladou "o apoio, a solidariedade e o afecto ás vítimas e ás súas familias nun momento tan difícil e tan duro como este". "Penso ademais que recollo o sentir de toda Galiza se digo que este tipo de accidentes nos chegan ao máis fondo porque aquí tamén vivimos un accidente ferroviario que segue marcando as nosas vidas e que, lamentablemente, non foi investigado no seu momento como debera", agregou.
"Desde o BNG queremos trasladar todo o recoñecemento e apoio para as persoas que están traballando nos servizos de rescate e de emerxencia, desde bombeiros, persoal que está na zona ou o persoal sanitario que está facendo un labor fundamental para salvar vidas, para axudar nun momento destas características", salientou Pontón, quen indicou que "hoxe non é o día para esixir responsabilidades nin explicacións, nin tampouco para sacar conclusións que poden ser precipitadas".
O secretario xeral do PSdeG, José Ramón Gómez Besteiro, mostrouse "profundamente conmocionado" polo accidente. "En Galicia sabemos ben o que significa vivir unha traxedia así. Sei que non hai palabras que alivien a dor de quen perdeu un ser querido nin a anguria das familias que agardan novas dos seus. Quero trasladarlles todo o meu agarimo e solidariedade, así como a pronta recuperación dos feridos", sinalou Besteiro, que tamén recoñeceu o labor dos servizos de emerxencia que están a traballar sobre o terreo.
O delegado do Goberno de España en Galicia, Pedro Blanco, expresou a súa consternación polo grave accidente ferroviario entre Los Yébenes e Urda, na provincia de Toledo. "Todo o meu cariño e apoio ás persoas afectadas e ás súas familias. Grazas aos equipos de emerxencia polo seu traballo nestes momentos tan difíciles", destacou.
O presidente da Plataforma de Vítimas de Angrois, Jesús Domínguez, lamenta que tras accidentes como o de Santiago ou o de Adamuz "non se aprende porque non hai consecuencias políticas". Contámolo aquí.
A Federación Galega de Municipios e Provincias súmase á convocatoria realizada pola FEMP e convida "a todas as institucións, entidades, traballadores/as e veciñanza a participar nun minuto de silencio hoxe, mércores 28 de outubro de 2026, ás 20 horas, ás portas dos concellos, como mostra de apoio".
A alcaldesa de Santiago de Compostela, Goretti Sanmartín, enviou a súa "solidariedade" para as persoas afectadas polo accidente e "todo o ánimo" para os equipos de emerxencias. "En Santiago sabemos ben o impacto de situacións como esta", asegura.
A Federación Galega de Municipios e Provincias súmase á convocatoria realizada pola FEMP e convoca un minuto de silencio ás portas dos concellos "como mostra de apoio" este serán ás 20h
A actividade das catro Deputacións provinciais tamén quedou suspendida este mércores. Valentín Formoso, presidente da Deputación da Coruña, enviou o seu pésame a familiares e achegados das vítimas e aseverou que "a solidariedade e o apoio da provincia da Coruña están con vós". "Toda a provincia de Pontevedra está nestes momentos coas vítimas e os seus achegados, e desexamos unha pronta recuperación aos feridos", traslada o presidente da Deputación de Pontevedra, Luis López.
Os sindicatos tamén expresaron a súas condolencias. "Todo o noso cariño e solidariedade coas vítimas e as súas familias, o noso apoio ás persoas feridas, aos equipos de emerxencia e ás traballadoras e traballadores ferroviarios", manifesta UGT Galicia. "Queremos trasladar as nosas condolencias ás vítimas e a todas as persoas afectadas, incluídos os traballadores e traballadoras dos trens", traslada CCOO Galicia.
Dende a Confederación de Empresarios de Galicia expresan unha "profunda consternación" pola traxedia ferroviaria e trasladan condolencias e afecto "nestes momentos de dor".
O Grupo de Intervención Psicolóxica en Catástrofes e Emerxencias (GIPCE) do Colexio Oficial de Psicoloxía de Galicia fixo público tamén o seu máis profundo pesar polo grave accidente ferroviario ocorrido este mércores. "A gravidade deste suceso pon de manifesto, unha vez máis, a importancia da intervención psicolóxica especializada nas situacións de emerxencia e catástrofe", lembran.
"A atención ás necesidades emocionais das vítimas, das súas familias e das persoas directamente implicadas constitúe unha parte esencial da resposta ante acontecementos desta magnitude", indican nun comunicado, para engadir que "resulta fundamental garantir unha atención profesional adaptada ás necesidades e aos tempos de cada persoa, tanto nas primeiras horas como ao longo do proceso posterior".
O Parlamento de Galicia convoca para este xoves, ás 12 horas, un minuto de silencio en memoria das vítimas do accidente ferroviario. Chegará despois da concorrida asistencia aos minutos de silencio do serán deste mércores.