Ata 1999 estaba en 0,8 e agora o ministro, Fernando Grande-Marlaska, cre que "a sociedade está madura" para esta nova redución
Ata 1999 en España era posible conducir con ata 0,8 gramos de alcol por litro de sangue, ou 0,4 miligramos por litro en aire. Aquel ano, para adecuarse á situación no resto de Europa, aquelas cifras foron reducidas e agora, 25 anos máis tarde, o Ministerio de Interior propón volver rebaixalas a menos da metade. Segundo o ministro, Fernando Grande-Marlaska, "a sociedade está madura" para a nova restrición, que defende ademais como "un compromiso do Goberno, clave para reducir a sinistralidade".
Actualmente o límite para conducir en xeral é de 0,5 gramos de alcol por litro de sangue, ou de 0,25 miligramos por litro de aire. Para condutores noveles e profesionais o límite é inferior, de 0,3 gramos por litro de sangue. Coa proposta na que agora traballa Interior o novo límite será para calquera tipo de condutor de 0,2 gramos de alcol por litro de sangue ou 0,1 miligramos por litro de aire.
"En máis da metade dos sinistros aparece o elemento do alcol e outras drogas como determinante", salienta o ministro
Grande-Marlaska anunciou a medida nun almorzo informativo no que dixo que lle fora solicitada polo Consello Nacional de Seguridade Vial a proposta das asociacións de vítimas e de seguridade viaria. Unha medida que parte da realidade de que "en máis da metade dos sinistros aparece o elemento do alcol e outras drogas como determinante".
Ademais de rebaixar a taxa de alcol, o ministerio vén reforzando as campañas de vixilancia. Hai un mes realizou unha específica en Galicia tras detectar nunha soa semana do mes de agosto do pasado ano un total de 538 positivos.
