O TSXG considera "sorprendente" que para non indemnizar á familia a Xunta restase valor a un informe dun forense do seu propio Instituto de Medicina Legal de Galicia (Imelga)

Ingresou en Urxencias no Hospital Álvaro Cunqueiro "por xesto autolítico" e o Sergas fixo constar as súas "ideacións" suicidas, manifestadas "de forma expresa". O home, de 31 anos, quedou ingresado na unidade de Psiquiatría, pero nin se lle aplicou o protocolo de prevención de suicidio nin se lle fixo seguimento continuo e finalmente logrou suicidarse no propio hospital. 

Así o constata outra condena do Sergas por non vixiar debidamente un paciente suicida, desta volta unha sentenza ratificada polo Tribunal Superior de Xustiza de Galicia (TSXG), que considera "sorprendente" que para non indemnizar á familia a Xunta restase valor a un informe dun forense do seu propio Instituto de Medicina Legal de Galicia (Imelga).

Segundo os feitos probados da sentenza ratificada polo TSXG e agora feita pública, que se suma a outras varias de desatención de suicidas nos últimos anos por parte do Sergas, o home, con antecedentes psiquiátricos, relatou no seu ingreso en Urxencias en xaneiro de 2020 que "quere morrer" e que "non vai parar ata suicidarse". Porén, malia os seus antecedentes, considerouse que a súa situación debíase a que estaba "baixo os síntomas de intoxicación de diversas substancias" e quedou ingresado sen que se lle activase o protocolo de valoración e prevención do suicidio e sen que tivese un seguimento continuo. 

Ante eses feitos un xulgado de Vigo condenou o pasado ano ao Sergas a indemnizar á nai e o fillo do falecido, pero o Sergas recorreu. E agora o TSXG ratifica a súa condena. Faino nunha sentenza na que o tribunal considera "sorprendente que para o Sergas o informe emitido en sede xudicial por un facultativo do Imelga non revista a suficiente adecuación para ditaminar pericialmente acerca do asunto, cando se trata dun órgano da Administración de xustiza en Galicia". 

Pola contra, o tribunal considera máis crible e independente a valoración do caso por parte do forense do Imelga que por parte do xefe de servizo de Pisquiatría porque os feitos "acaeceron no seu servizo e é responsable do seu funcionamento".

Como noutros casos anteriores de desatención de suicidas, a Xunta rexeitou indemnizar a familia, un xulgado condenouna e o TSXG mesmo eleva a contía

Para o TSXG é reprochable tanto "que non se activase o protocolo e o seguimento continuo" como "que non se adoptasen medidas acordes coa situación do paciente, que por definición é cambiante". "A administración tiña o deber de extremar o coidado dado que os propios facultativos observaron unha alteración de conduta precedida dun intento autolítico inmediato", conclúe o tribunal, que no só rexeita o recurso do Sergas senón que mesmo eleva a indemnización a pagar ao fillo do falecido. 

Outros casos anteriores

Nos últimos anos o Sergas vén recibindo condenas similares por non facer todo o que debera para evitar suicidios nos seus hospitais de persoas con antecedentes psiquiátricos. O pasado novembro este diario contou como o mesmo TSXG ratificara outra condena do Sergas polo falecemento en Pontevedra dun home que "presentaba un risco de suicidio extremo e inminente e este debía ser coñecido polo persoal, dados os seus reiterados intentos autolíticos e as manifestacións que efectuaran en repetidas ocasións os familiares". Aínda así o home foi deixado "durante un lapso non menor de media hora sen vixilancia de ningún tipo", momento no que puxo fin á súa vida.

Un ano e medio antes, en febreiro de 2023, o Tribunal Superior de Xustiza de Galicia (TSXG) ratificou igualmente a indemnización dunha familia polo suicidio dunha muller de 74 anos no Hospital Lucus Augusti de Lugo. A sentenza relatou como había "suficientes signos de alarma que xustificaban que a administración sanitaria adoptase algunha medida extra de vixilancia"da muller aínda que estivese ingresada noutro servizo médico e non no de Psiquiatría.

A muller xa tentara suicidarse un mes antes, estaba a tratamento psiquiátrico e "o día anterior á consumación do feito puxera de manifesto que o ía facer". A sentenza recolle que aínda que neste caso a muller non estivese ingresada en Psiquiatría e non se lle aplicasen todas as medidas que o plan de prevención de suicidios prevé para dita unidade, "a situación descrita si entendemos require unha actuación da Administración sanitaria máis adecuada ás circunstancias".

Nun dos casos condenados pola xustiza nos últimos anos o propio Sergas admitiu "unha importante quebra no curso da asistencia prestada"

Outro ano antes, en maio de 2022, o TSXG confirmaba outra condena ao Sergas a indemnizar igualmente a outros familiares polo suicidio dunha muller de 37 anos neste caso si ingresada nunha unidade de Psiquiatría por "risco autolítico". Dous días despois do ingreso logra suicidarse, nun caso no que o propio Sergas admitiu "unha importante quebra no curso da asistencia prestada".

E outro ano antes, en abril de 2021, o mesmo Tribunal Superior condenaba igualmente ao Sergas a indemnizar a outra familia polo suicidio dunha muller de 47 anos no complexo hospitalario de Santiago (CHUS). Fora ingresada por orde xudicial cun cadro psicótico e estaba a ser tratada no servizo de Neuroloxía, pero a sentenza conclúe que "o adecuado sería ou ben remitila a unha unidade psiquiátrica, onde hai maiores medidas de vixilancia, ou ben establecer, por parte dos sanitarios do hospital, unhas medidas de maior protección".

O teléfono 024 de atención á conduta suicida é un servizo gratuíto, confidencial e dispoñible as 24 horas do día

O teléfono 024 de atención á conduta suicida do Ministerio de Sanidade é un servizo gratuíto, confidencial e dispoñible as 24 horas do día, os 365 días do ano. Trátase dunha liña telefónica de axuda ás persoas con pensamentos, ideacións ou risco de conduta suicida, e aos seus familiares e achegados. En caso de emerxencia vital inminente débese chamar directamente ao 061 ou 112.