Como noutros casos anteriores de desatención de potenciais condutas suicidas, a Xunta rexeitou indemnizar a familia, un xulgado condenouna a pagar 70.000 euros e agora o TSXG ratifica a contía 

Unha sentenza feita agora pública polo Tribunal Superior de Xustiza de Galicia (TSXG) revela un novo caso de suicidio nun hospital do Sergas dunha persoa ingresada con problemas psiquiátricos á que non se lle prestou toda a atención necesaria. Neste caso a xustiza sinala que o home "presentaba un risco de suicidio extremo e inminente", pero aínda así foi deixado "durante un lapso non menor de media hora sen vixilancia de ningún tipo", momento no que puxo fin á súa vida. Sentezas similares sobre suicidios por falta de vixilancia ou por nin sequera aplicar o protocolo de prevención a persoas con antecedentes veñen sucedéndose nos últimos anos.

O caso ocorreu en 2016 en Pontevedra. O home, "con antecedentes clínicos relacionados con ideas autolíticas desde o ano 2012", acudiu a Urxencias do CHOP "referindo padecer cefaleas desde o mes anterior". Os médicos derivárono á unidade de psiquiatría e alí "se lle deu de alta o mesmo día". Pero oito días máis tarde, relata a sentenza, "por recomendación do seu médico de cabeceira, ingresa novamente na unidade de psiquiatría do CHOP", onde "ao día seguinte" logrou suicidarse na súa habitación.

A familia presentou unha reclamación administrativa contra a Xunta pero esta rexeitouna en 2020 e tiveron que recorrer á xustiza. Nela un xulgado do contencioso-administrativo de Santiago deulles a razón en decembro de 2022 e condenou a Xunta a indemnizar a diversos familiares con contías que suman 70.000 euros, sentenza que foi recorrida polos afectados e que agora é ratificada polo TSXG.

A xustiza sinala que houbo "responsabilidade imputable á administración sanitaria por culpa in vigilando" xa que o falecido "presentaba un risco de suicidio extremo e inminente e este debía ser coñecido polo persoal, dados os seus reiterados intentos autolíticos e as manifestacións que efectuaran en repetidas ocasións os familiares do paciente aos servizos sanitarios". Un sucidicio que o home logrou concretar "porque estivo durante un lapso non menor de media hora sen vixilancia de ningún tipo". 

Porén, a xustiza modula a indemnización e reduce a contía que reclamaba a familia por considerar que "non podía darse por sentado que, aínda que a actuación da administración fose irreprochable, non se dese nalgún outro momento o falecemento" do home "pois a súa vontade de poñer fin á súa vida era, por desgraza, de notable firmeza". Por iso, a indemnización acordada é froito de "unha ponderación entre o acto autodestructivo e a actuación da administración". 

Outros casos anteriores

Nos últimos anos o Sergas vén recibindo condenas similares por non facer todo o que debera para evitar suicidios nos seus hospitais de persoas con antecedentes psiquiátricos. O pasado abril este diario contou como un xulgado do contencioso-administrativo de Vigo condenou o Sergas por non avaliar o risco nin aplicar o protocolo de prevención de suicidios a un home de 31 anos con antecedentes psiquiátricos ingresado nese servizo do Hospital Álvaro Cunqueiro. Malia o seu historial e declaracións do propio paciente asegurando que quería morrer, "non se considerou en momento algún a existencia dun risco de suicidio", conclúe a sentenza.

Un ano antes, en febreiro de 2023, o Tribunal Superior de Xustiza de Galicia (TSXG) ratificou igualmente a indemnización dunha familia polo suicidio dunha muller de 74 anos no Hospital Lucus Augusti de Lugo. A sentenza relatou como había "suficientes signos de alarma que xustificaban que a administración sanitaria adoptase algunha medida extra de vixilancia"da muller aínda que estivese ingresada noutro servizo médico e non no de Psiquiatría.

A muller xa tentara suicidarse un mes antes, estaba a tratamento psiquiátrico e "o día anterior á consumación do feito puxera de manifesto que o ía facer". A sentenza recolle que aínda que neste caso a muller non estivese ingresada en Psiquiatría e non se lle aplicasen todas as medidas que o plan de prevención de suicidios prevé para dita unidade, "a situación descrita si entendemos require unha actuación da Administración sanitaria máis adecuada ás circunstancias".

Nun dos casos condenados pola xustiza nos últimos anos o propio Sergas admitiu "unha importante quebra no curso da asistencia prestada"

Outro ano antes, en maio de 2022, o TSXG confirmaba outra condena ao Sergas a indemnizar igualmente a outros familiares polo suicidio dunha muller de 37 anos neste caso si ingresada nunha unidade de Psiquiatría por "risco autolítico". Dous días despois do ingreso logra suicidarse, nun caso no que o propio Sergas admitiu "unha importante quebra no curso da asistencia prestada".

E outro ano antes, en abril de 2021, o mesmo Tribunal Superior condenaba igualmente ao Sergas a indemnizar a outra familia polo suicidio dunha muller de 47 anos no complexo hospitalario de Santiago (CHUS). Fora ingresada por orde xudicial cun cadro psicótico e estaba a ser tratada no servizo de Neuroloxía, pero a sentenza conclúe que "o adecuado sería ou ben remitila a unha unidade psiquiátrica, onde hai maiores medidas de vixilancia, ou ben establecer, por parte dos sanitarios do hospital, unhas medidas de maior protección".

O teléfono 024 de atención á conduta suicida é un servizo gratuíto, confidencial e dispoñible as 24 horas do día

O teléfono 024 de atención á conduta suicida do Ministerio de Sanidade é un servizo gratuíto, confidencial e dispoñible as 24 horas do día, os 365 días do ano. Trátase dunha liña telefónica de axuda ás persoas con pensamentos, ideacións ou risco de conduta suicida, e aos seus familiares e achegados. En caso de emerxencia vital inminente débese chamar directamente ao 061 ou 112.