O Tribunal Superior constata que “a pesar dos incumprimentos” de seguridade da subcontrata para a que traballaba o afectado, golpeado por unha árbore, “Ence non procedeu a paralizar” a talla, polo que a considera “responsable solidaria” da sanción
O Tribunal Superior de Xustiza de Galicia (TSXG) vén de ditar unha sanción a Ence pola súa “planificación deficiente” e “falta de inspección” das tarefas de talla de árbores nun monte da Mariña que encargou a unha subcontrata, Maderas Cociña Xove SL. Durante os traballos un empregado desa empresa foi golpeado por unha árbore resultando con lesións moi graves e quedando en situación de gran invalidez.
A sentenza, que establece a “responsabilidade solidaria” na sanción de Ence e a subcontrata, chega despois doutra revelada hai un ano por Praza.gal que tamén avalou unha multa de Inspección de Traballo polo accidente mortal doutro operario porque non xestionou correctamente a seguridade do lugar no que estaba a traballar e que era da súa competencia.
Segundo os feitos probados da sentenza agora emitida polo TSXG, o accidente ocorreu en setembro de 2016. Ence subcontratou coa outra empresa sancionada a talla dun monte segundo un plan de traballo deseñado pola propia Ence que establecía que “o corte debería realizarse de forma ascendente”. Porén, a corta realizouse de xeito descendente, e malia que un encargado de Ence visitou a obra, non puxo “obxección algunha a pesar de que se estaba facendo o traballo de forma distinta á que consta no permiso de traballo”.
A sentenza censura "a escasa actividade 'in vigilando' de Ence" e que o seu encargado non puxo "obxección algunha a pesar de que se estaba facendo o traballo de forma distinta" a como ela mesma deseñara
A sentenza di que había “un procedemento de identificación de incumprimentos e asignación de sancións, obrante en autos, asinado por Ence e Maderas Cociña, que contemplaba a posible paralización da obra por indicación de Ence, o que non ocorreu dada a escasa actividade ‘in vigilando’ de Ence”. Así que o tribunal censura que “a pesar dos incumprimentos na execución da obra Ence non procedeu a paralizar a mesma, non impoñendo sanción algunha a Maderas Cociña SL, a pesar de que estaban realizando un traballo en contra do propio permiso de traballo entregado por Ence”.

Tras o accidente o Instituto de Seguridade e Saúde Laboral de Galicia (ISSGA), da Xunta, estableceu como causas “a deficiente planificación dos traballos do monte, a cal consta que realiza Ence”, así como a insuficiente información e formación do traballador. Porén, Inspección de Traballo propuxo que só fose sancionada a subcontrata coa figura do recargo de prestacións por accidente, que obriga ás empresas a aumentar ao seu cargo unha porcentaxe da prestación da seguridade social que se lle recoñece a un traballador que tivo un acccidente laboral.
A subcontrata e a familia do traballador afectado recorreron á xustiza, que nunha primeira instancia rexeitou as súas pretensións. Pero agora o Tribunal Superior vén de darlles a razón e di que tamén Ence debe ser considerada responsable solidaria do ocorrido. Para iso o TSXG citra outras sentenzas previas que tamén estableceron a responsabilidade da empresa principal neste tipo de accidentes. E salienta que neste caso “parece clara a responsabilidade de Ence, sendo esta a empresa que encarga a Maderas Cociña o traballo, e quen deseña o plan de traballo, e sendo ademais o encargado de Ence quen indica como se debe proceder á corta”.

O TSXG salienta a “falta de inspección seria da obra, o que obviamente determina a responsabilidade solidaria da empresa Ence"
A sentenza conclúe sobre Ence que “ela mesma tamén incumpre” o seu propio permiso de traballo. E salienta a súa “falta de inspección seria da obra, o que obviamente determina a responsabilidade solidaria da empresa Ence no recargo de prestacións do accidente sofrido polo traballador”.
A sentenza é recorrible en casación. Ence, pola súa banda, vén salientando a importancia que dá á prevención de riscos laborais nas súas diversas actividades empresariais.