Ence disparou o seu beneficio neto consolidado no pasado ano 2022 ata case 248 millóns de euros (247,6), segundo informou este martes a compañía á Comisión Nacional de Mercados e Valores (CNMV).
As ganancias supoñen un récord na compañía, que atribúe os bos resultados aos "fortes" prezos da celulosa e aos "bos" resultados operativos, que inclúen unhas marxes de negocio incrementadas pola mellora do tipo de cambio, o que lle serviu para compensar a inflación no custo das materias primas e minorar as consecuencias da suspensión da actividade en Lourizán (Pontevedra) durante varios meses.
Ence rexistrou en 2021 unhas perdas de 190 millóns ao incluírse o impacto estimado pola anulación da prórroga da fábrica de Pontevedra
Foi durante a maior parte do terceiro trimestre do ano cando a fábrica á beira da ría de Pontevedra estivo parada, logo que desde finais de xullo a empresa se vise abocada á "suspensión temporal da actividade" pola "baixada do caudal do río Lérez, do que se abastece a planta, por baixo do seu nivel".
Os resultados positivos chegan logo de que en 2021 Ence rexistrase perdas por valor de algo máis de 190 millóns de euros, un resultado que incluía o impacto estimado pola compañía das sentenzas que anularan a prórroga da fábrica de Pontevedra e sen o cal tería virado en 9,8 millóns en beneficios.
Agora, e logo de que o pasado 7 de febreiro o Tribunal Supremo avalase a prórroga da concesión de Ence na ría de Pontevedra nunha decisión contraria á da Audiencia Nacional, a empresa destaca "a reversión das deterioracións de activos e provisións de gastos" feitas en 2021 en previsión polas sentenzas previas que ordenaban a súa marcha de Lourizán. A devandita reversión supuxo incluír 169 millóns no beneficio do cuarto trimestre, que ascendeu aos 180, logo de que a reserva de fondos para un eventual desmantelamento da factoría fose anulada.
Ence destaca o efecto da sentenza do Supremo que avalou a súa continuidade en Pontevedra, o que lle permitiu reverter os 169 millóns que prevía de impacto
En resumo, o resultado operativo do negocio de Celulosa alcanzou os 27 millóns de euros no cuarto trimestre e elevouse ata os 138 millóns de euros no conxunto de 2022. Doutra banda, o resultado operativo do negocio de Enerxía Renovable alcanzou os 13 millóns de euros no cuarto trimestre, elevando o acumulado do ano ata os 110 millóns de euros.
A fortaleza do balance económico de 2022, segundo destacan desde Ence, achega "flexibilidade" á compañía para aproveitar as oportunidades de crecemento. Deste xeito, no negocio da Celulosa, Ence continúa avanzando no proxecto Navia Excelente para potenciar a venda dos seus produtos diferenciados, para o que contempla un investimento estimado de máis de 105 millóns de euros no período 2023-2025.
Ademais, a compañía anunciou en 2022 que está a analizar un novo proxecto nas Pontes para a produción de fibra branqueada mixta, a partir de papel e cartón recuperado, e de fibra virxe producida por Ence. A primeira fase do proxecto consiste nunha liña de 100.000 toneladas anuais que podería estar operativa en 2026, cun investimento inicialmente estimado de 125 millóns de euros.
Mentres, no negocio de enerxía renovable, Ence está a desenvolver unha carteira de 140 megawatts (MW) en biomasa a través da súa filial Magnon Green Energy, ademais doutros 673 MW fotovoltaicos.
Por outra banda, o consello de administración de Ence acordou repartir un dividendo excepcional a conta dos resultados de 2022 por importe de 70 millóns de euros, equivalente a 0,29 euros brutos por acción, que se abonará o próximo 16 de marzo.
Estes 70 millóns súmanse aos 67 millóns xa distribuídos durante o ano pasado, o que eleva a cifra total ata os 137 millóns de euros.
