Érika Reija, gañadora do XVIII Premio José Couso de Liberdade de Prensa, asina o manifesto polo Día internacional da liberdade de prensa do Colexio Profesional de Xornalistas de Galicia cun chamado a "recuperar algo do prestixio e a credibilidade que un día tivo este nobre oficio"
"É hora de volver ás orixes. Primar a calidade sobre a cantidade, as crónicas ben documentadas sobre os textos rápidos ou as conexións ininterrompidas que engaden máis ruído ou ideoloxía que unha información rigorosa, veraz e de valor para as nosas audiencias".
Na guerra da desinformación, fagamos que gañe a verdade é o título do manifesto do Colexio Profesional de Xornalistas de Galicia polo Día internacional da liberdade de prensa, que este ano asina a xornalista Érika Reija, galardoada co XVIII Premio José Couso de Liberdade de Prensa despois da súa cobertura como corresponsal de TVE en Rusia, que a levou a vivir en primeira liña as primeiras semanas da guerra da Ucraína.
"O noso oficio, o bo oficio, require máis que nunca de tempo para separar o gran da palla”, afirma Reija
"O noso oficio, o bo oficio, require máis que nunca de tempo para separar o gran da palla, o que hai de certo entre tantos enganos... Difícil tarefa nesta era da inmediatez", razoa a xornalista de Lugo, que non pasa por alto a "precariedade" que golpea especialmente aos autónomos, "pero tamén aos reporteiros incluídos nos cadros de persoal, sometidos cada vez a maiores esixencias de produtividade".
Érika Reija afirma no manifesto que para "recuperar algo do prestixio e a credibilidade que un día tivo este nobre oficio" é precisa esa volta ás “orixes". "Pola contra, o xornalismo estará ferido de morte. Tamén a democracia. E os que queren impor o seu dominio, matando antes a verdade, terán gañado. Non o permitamos", asevera.
Reija tivo que abandonar a corresponsalía en Rusia cando informar desde este país se converteu nun imposible: "Na Rusia de Putin só se escoita xa a propaganda oficial, empregada a fondo en xustificar os seus ataques e construír unha realidade alternativa, segundo a cal matanzas como a perpetrada en Bucha serían unha montaxe".
A xornalista recolle no manifesto para o Día internacional da liberdade de prensa como en Rusia "os poucos medios independentes que loitaban por sobrevivir á xa asfixiante falta de liberdade de prensa tiveron que pechar". E incide en que "ante campañas de desinformación promovidas desde calquera Estado, o deber dos xornalistas é investigar para dar coa verdade", para que a opinión pública non chegue á conclusión de que "agresores e agredidos, vítimas e verdugos, son o mesmo".
Un mural en defensa da liberdade de expresión, as mulleres xornalistas e a igualdade de xénero na profesión
Un mural pola liberdade de expresión
Con motivo da celebración do Día internacional da liberdade de prensa, o Colexio Profesional de Xornalistas de Galicia tamén promove, neste caso coa colaboración da Concellería de Cultura do Concello de Lugo, a realización dun mural en defensa da liberdade de expresión, as mulleres xornalistas e a igualdade de xénero na profesión.
Unha obra que estará a cargo da artista Xoana Almar, que xunto a Miguel Peralta e Raquel Doallo constituíu a cooperativa Cestola na Cachola, onde traballa como muralista, pintora e ilustradora. Este martes comezou os traballos que farán realidade o mural na parede circular dun dos edificios da antiga Frigsa, no lucense parque da Milagrosa.
"A artista traballa nunha proposta fundamentada nun dos principos básicos do xornalismo que resume a profesión en tres accións: ir, ver e contar. Ao tempo visibiliza como as mulleres constitúen na actualidade a maior forza de traballo nas redaccións de todo o país e tamén a importancia de escoller voces e olladas femininas como fonte de información para reflectir axeitadamente a pluralidade do noso mundo", explican desde o Colexio de Xornalistas.
Este proxecto encádrase na terceira edición do festival de arte urbano Culturban, organizado pola área de Cultura do Concello de Lugo e o Espazo Lupa Arte, e coordinado polo artista lugués Iago Eireos.
