Os centros educativos chegaron ás vacacións do Nadal con case o dobre de casos activos que os que hai ás portas da Semana Santa, e agora hai nove aulas pechadas fronte ás 53 de decembro
O impacto da COVID-19 nos centros de ensino segue a replicar o comportamento da pandemia no resto da sociedade. Se a estabilidade é a nota dominante nas dúas últimas semanas no global de Galicia, tamén o é na educación, onde se chega ás vacacións de Semana Santa e con elas ao remate do segundo trimestre do curso escolar con menos de 500 casos activos, case a metade dos que había cando comezaron as vacacións de Nadal, tras as que os positivos se dispararon. En todo caso, a Xunta non comunica os novos casos que se van rexistrando senón só os que hai activos en cada momento.
Segundo as cifras divulgadas pola Xunta este sábado, correspondentes á situación rexistrada este venres, último día lectivo antes da Semana Santa, había 446 casos activos entre alumnado e persoal e un total de só 9 aulas pechadas, fronte ás 53 que había xusto antes do Nadal. Ningún centro educativo está pechado por completo.
O centro máis afectado é o CPR Tirso de Molina de Ferrol, con 21 casos activos e unha aula pechada
Segundo a información facilitada pola Xunta, o centro máis afectado é o CPR Tirso de Molina de Ferrol, con 21 casos activos e unha aula pechada, seguido por dous centros de Arteixo, o IES Manuel Murguía e o CEIP Ponte dos Brozos, con 14 e 12 casos respectivamente. Pola súa banda, a escola infantil Kid's Garden da Coruña ten dúas aulas pechadas por dous positivos.