Nunca en Galicia, dende que hai rexistros comparables, houbera un incendio forestal de dimensión tan grande como o que segue a arder no Courel. Máis aínda dende que, este 25 de xullo, a Xunta confirmase que o único incendio nesta contorna natural lucense que seguía considerando de maneira independente, o de Seceda (Folgoso do Courel) xa se "xuntou" co resto. Cinco focos (dous en Vilamor e un en Seceda -Folgoso- e dous en Saa -na Pobra do Brollón- viraron nun só que, segundo as medicións provisionais da Xunta, supera as 11.000 hectáreas ardidas nun perímetro aínda non controlado, só estabilizado.
A Xunta confirma que o do Courel xa é considerado un único incendio mentres os datos do satélite europeo Copernicus elevan a 13.000 as hectáreas ardidas
Esta medición provisional vai alén segundo outra fonte, a dos datos obtidos polo Sistema Europeo de Información sobre Incendios Forestais (EFFIS, polas siglas en inglés) a través do satélite comunitario Copernicus. Estes datos, tamén provisorios, indican que no Courel arderon xa 13.228 hectáreas de monte. Así o plasmou o servizo de emerxencias da UE en mapas como o que encabeza esta información.
Os datos de Copernicus tamén difirem un chisco das medicións provisionais da Xunta no outro principal incendio desta vaga en Galicia, o de Carballeda de Valdeorras, que foi dado por controlado no serán do pasado luns e no que a superficie oficialmente ardida segue sendo de 10.500 hectáreas. Os instrumentos do servizo de emerxencias da UE elévana ata 12.388.
Á espera das medicións definitivas cando estes incendios estean extinguidos, serían entre 21.600 e 25.600 as hectáreas ardidas nos xa históricos incendios do Courel e Valdeorras. A súa enorme superficie deixa en segundo plano outro incendio forestal inusualmente amplo, o que golpea o parque natural do Invernadeiro en Vilariño de Conso e que foi dado por estabilizado igualmente este 25 de xullo, cando xa arrasara unhas 6.500 hectáreas, segundo medicións tamén provisionais.
![](https://praza.gal/storage/uploads/fyciaymwqaayxpp-202cf70.jpeg)
Medio Rural xa non considera activos ningún dos incendios comunicados na actual vaga, que rolda as 33.000 hectáreas
Alén dos principais focos, a principal novidade do parte de Medio Rural neste 26 de xullo é que xa se pode considerar extinguido o incendio de Rabal, en Oímbra, con 2.100 hectáreas ardidas. Sempre segundo este parte -que non inclúe necesariamente todos os incendios existentes-, a primeiras horas deste martes xa non quedarían incendios co carácter de activos en Galicia, xa que os catro dos que informa a Consellería están estabilizados (O Courel e O Invernadeiro) ou controlados (Carballeda e Quiroga).
Neste contexto, e co groso dos incendios forestais comunicados pola Xunta durante a actual vaga xa extinguidos, o balance total de hectáreas ardidas roldará, como mínimo, as 33.000. O 2022 vai ser xa, como mínimo, o ano con máis monte queimado no país dende 2017 mentres se agudiza a tendencia de padecer un menor número de incendios, pero con algúns moito máis extensos, virulentos e difíciles de extinguir.