Despois do derrubamento do falso teito na sala de partos o 30 de decembro de 2023, a Consellería de Sanidade coñecía o risco de que o teito seguira caendo en todo o hospital Materno Infantil de Ourense, onde esta fin de semana se produciu un novo incidente, porque xa sabía a causa. Agora o conselleiro di que van "anticipar" os traslados
“Hai que convivir con estas situacións no Materno Infantil”, manifestou a directora Asistencial da área sanitaria de Ourense nunha reunión extraordinaria do Comité de seguridade e saúde que tivo lugar en xaneiro de 2024, tras o derrubamento o 30 de decembro de 2023 do falso teito nas salas de partos da primeira planta do hospital. Pasou máis dun ano ata que na madrugada deste sábado parte do teito volveu desprenderse nese mesmo edificio, esta vez na zona de Pediatría, na terceira planta.
Os danos en ambos incidentes foron materiais, pero a información á que tivo acceso Praza.gal demostra que na Consellería de Sanidade coñecían o risco de que o teito seguira caendo –“non se pode afirmar plenamente que a situación non se volva repetir”, asegurou a directora de Recursos Económicos naquela reunión– e tiñan identificada a causa –“esta circunstancia está provocada polas actuacións posteriores que se fixeron no seu día para instalar o aire acondicionado”–.
O conselleiro de Sanidade, Antonio Gómez Caamaño, visitou este mércores o Complexo Hospitalario Universitario de Ourense (CHUO) e asegurou que no verán estará culminado o traslado provisional da hospitalización do Materno Infantil. Segundo trasladou o conselleiro, “tendo en conta que sería conveniente reforzar os falsos teitos e que para acometer esa actuación sería necesario parar a actividade do Materno varias semanas”, o que se decidiu é “anticipar” ese traslado provisional “que xa estaba previsto” para resituar a zona de hospitalización infantil e obstétrica así como as salas de partos noutros espazos do complexo hospitalario.
O proxecto ‘O futuro para a sanidade pública de Ourense’ presentouse o 2 de xullo de 2021 polo daquela presidente da Xunta, Alberto Núñez Feijóo. Ese día avanzaron que o CHUO contaría cun “47% máis de superficie” en relación a doce anos atrás e que se construirían “tres edificios: un de hospitalización, coa reforma do hospital Materno Infantil, outro ambulatorio e outro administrativo”.
“Hoxe mesmo publicamos a licitación da construción do novo edificio de hospitalización e a reforma do hospital Materno Infantil”, salientou Feijóo, quen precisou que a nova infraestrutura, “que estará situada entre o Materno e o hospital de Cristal, contará con 12 plantas”. Pero os plans mudaron co avance das obras e a Xunta tivo que desbotar a reforma do Materno, que no proxecto vixente será derrubado para construír un novo.
"É un edifico vello que necesita reparacións e mantemento, ten gretas dende hai anos e a construción ao lado impide a oscilación normal do hospital", recoñeceu un cargo de Sanidade hai máis dun ano sobre o Materno
Segundo a información á que tivo acceso Praza.gal, nunha reunión da Comisión de centro de atención especializada de Ourense en xaneiro de 2024, tras o primeiro derrubamento no hospital Materno Infantil, o xerente da área sanitaria explicou que ao tratarse dunha “estrutura antiga” os falsos teitos son “non rexistrables”, non é posible desmontalos para ver o estado da suxeición. “Son falsos teitos de escaiola continuada, o que fai que calquera tensión que soporte o edificio pode afectar á consistencia dos falsos teitos. Imos avaliar a súa resistencia e, con carácter preventivo, faremos algunha intervención para evitar accidentes”, sostivo o responsable da área.
Na mesma liña pronunciouse a directora Asistencial na xuntanza extraordinaria do Comité de Seguridade e Saúde, na que sinalou que o Materno “é un edifico vello que necesita reparacións e mantemento, ten gretas dende hai anos e a construción ao lado impide a oscilación normal do hospital”. Toda esta conxuntura, en plenas obras do novo edificio, “fai que sexa necesario estar máis vixiante do que sucede”, advertiu hai un ano.
A Consellería de Sanidade incide agora en que o edificio é “estruturalmente seguro” e que o problema está nos falsos teitos, con todo, o criterio da Xunta mudou do luns ao mércores, pois no comezo da semana desbotou a idea de trasladar parte de actividade asistencial, un proceso que agora van “anticipar” con respecto ao planificado polas obras.
20 camas de UCI e outras 10 pechadas
A situación na Unidade de Coidados Intensivos (UCI) do hospital de Ourense vén sendo inestable desde a pandemia, cando o persoal tivo que asumir os “apaños” para sacar adiante a atención. “No proceso da pandemia todos entendemos que era unha cuestión temporal e que había que garantir a atención”, explican profesionais da UCI a Praza.gal, “pero no momento no que rematan as obras, non entendemos por que nos deixan con dúas camas menos que ao inicio e desmantelan unha unidade nova completamente funcional con dez boxes e adaptada ás necesidades actuais dunha UCI, que estivemos usando estes meses, que agora está baleira”.
“É completamente falso, no momento no que se abriu a UCI nova con 20 camas desmantelouse o módulo de dez camas no que estabamos traballando”, asegura o persoal da UCI
A Consellería de Sanidade optou por ir reformando por partes o complexo hospitalario ourensán, o que implicou máis dun ano de obras que afectaron á zona de críticos, onde antes de iniciar estes traballos dispoñían de 22 camas de hospitalización. As obras tiveron varias fases, na primeira construíuse o primeiro módulo con dez boxes onde se traballou ata hai dúas semanas, escasos días despois de que o presidente da Xunta visitara o hospital para anunciar o remate das obras na UCI. Alfonso Rueda gabouse dos 30 boxes de hospitalización da nova Unidade de Coidados Intensivos tras unha inversión de dez millóns de euros.
Unha información na que se ratificou a xerencia da área sanitaria de Ourense a preguntas de Praza.gal este mércores: “A nova Unidade de Coidados Intensivos de Ourense está dotada con tres módulos con dez boxes cada un; deles, seis de illamento; ademais de zonas de observación, locais de apoio e sala de familiares. En total, actuouse nunha superficie de 2.649 metros cadrados, pasando a 30 camas, nas que se aplicou o aprendido na pandemia que demostrou que, en momentos de tensión, podería ser preciso dispoñer de máis camas de críticos, polo que agora están dispoñibles de ser precisas”.
“É completamente falso, no momento no que se abriu a UCI nova con 20 camas desmantelouse o módulo de dez camas no que estabamos traballando”, asegura o persoal da UCI consultado por Praza.gal, que detalla como horas despois do peche desa unidade de hospitalización a nova UCI de 20 camas quedou pequena e houbo que recorrer a un espazo “peor dotado que o que se usaba na pandemia” e incluso a camas de observación do servizo de Urxencias. Por outra banda, mantense aberta a Unidade de Recuperación Postanestésica (URPA), mais o persoal afirma que carece do material necesario para garantir unha boa asistencia.
"A poboación de Ourense ten que saber que de ter 22 camas de UCI, pasou a ter a 20. E que o paciente número 21 ou 25 ingresa nunha unidade peor dotada e en peores condicións que o paciente número cinco"
“A poboación de Ourense ten que saber que de ter 22 camas de UCI, pasou a ter a 20. E que o paciente número 21 ou 25 ingresa nunha unidade peor dotada e en peores condicións que o paciente número cinco. Cousa que non debera pasar, sobre todo tendo un módulo de dez camas pechado por completo”, asevera o persoal da UCI, que trasladou as súas queixas aos seus supervisores e xefatura, e rexistrou un escrito para a xerencia da área.
As profesionais da UCI describen así o espazo no que teñen que ingresar agora aos doentes críticos que non entran na nova UCI: “Son camas corridas tipo barracón, separadas por cortinas. Están peor que nun cuarto dunha planta de hospitalización normal. Isto é todo o contrario á humanización da atención”. “Non se pode traballar todos os días pelexando”, critican as e os profesionais, entre os que medran a “ansiedade” e o “cabreo”. Consideran que é preciso un plan e “non deixar toda a organización á sorte de que baixe o número de pacientes”.
Esta semana, coa ‘crise’ derivada da nova derruba de parte do teito no hospital Materno Infantil, Sanidade comunicou que ese módulo con dez camas de UCI converterase temporalmente na UCI pediátrica e neonatal, a causa do adianto nos traslados. “Non está claro o que van facer, pero en todo caso non poden dicir que desmantelaron ese módulo pensando xa no traslado do Materno porque fixérono máis dunha semana antes”, transmite o persoal desta unidade. Este mércores había 26 pacientes de UCI ingresados no hospital ourensán, polo que seis deles non cabían na propia UCI.
