Na gala, Músicas ao Vivo apelou a fortalecer a contratación de artistas galegos e tamén reclamou á unión da comunidade musical e defendeu o acceso á cultura de toda a cidadanía
A música galega viviu este mércores a súa gran noite de celebración anual. No Pazo da Cultura de Pontevedra entregáronse 12º Premios Martín Códax, que recoñeceron os mellores artistas e proxectos musicais do país, nunha gala na que Leilía recolleu o galardón honorífico que recoñece a súa traxectoria e na que os recentemente finados Emilio Cao e Piti Sanz foron tamén homenaxeados.
Foi unha gala na que, no ano das cantareiras, se botou a vista atrás, ás gardiás da tradición, e na que ademais un gran número de mulleres obtiveron cadanseu galardón: A Pedreira, Faia, Sabela, Helena Egea, Rumia, Nadie González ou María Domínguez, entre outras. Así mesmo, Músicas ao Vivo apelou a fortalecer a contratación de artistas galegos e tamén reclamou á unión da comunidade musical e defendeu o acceso á cultura de toda a cidadanía.
O premio ao mellor Artista Emerxente foi para Paracetafolk, da Costa da Morte
Na gala, presentada por Lupe Blanco e Xisco Feijóo, coa música ao vivo do grupo Ailá e que homenaxeou á oralidade e á música tradicional, acompañaron á directiva de Músicas ao Vivo representantes das entidades e institucións que apoian os Martín Códax da Música.
De Ninghures, coa súa particular fusión da música tradicional galega con ritmos e inspiracións doutras culturas como a latinoamericana ou a magrebí, recolleu premio en Folk. A rapeira viguesa Nadie González resultou premiada en Músicas Urbanas coa súa proposta inspirada na poesía de Xela Arias, Rosalía, Alejandra Pizarnik e Alfonsina Storni.
Tamén se recoñeceu o traballo de Os John Deeres na categoría Rock e Punk; con case dúas décadas de andaina o grupo ven de editar o disco O círculo das formigas. Un dos proxectos musicais máis celebrados no último lustro en Galicia, a Orquestra Galega de Liberación, dirixida por Xacobe Martínez Antelo e da que forman parte 20 intérpretes, recibiu o premio na categoría de Jazz e Músicas improvisadas
O discurso da directiva de Músicas ao Vivo levantou aplausos ao apuntar que os artistas non poden quedar á marxe de situacións que afectan á cidadanía como o proxecto de Altri ou o xenocidio israelí
Ademais, a entrega do melómano na categoría de Artista Emerxente era unha das máis agardadas da noite en Pontevedra. No Pazo da Cultura, os tres finalistas Ash Diz, Paracetafolk e Ulex, nunha categoría que nacía en 2022 para apoiar carreiras artísticas e visibilizar novos talentos musicais. Finalmente os aplausos da gala foron para Paracetafolk, grupo que debutou o pasado ano cunha proposta musical, desde a Costa da Morte, baseada en arranxos e composicións propias, e mesmo algunha peza que mestura o tradicional con pop-rock.
Entregáronse tamén os Premios Organistrum, que recoñecen en cada edición aos cómplices necesarios da música ao vivo: salas, festivais e proxectos de comunicación. A Sala Rebullón, en Mos, foi recoñecida na primera categoría, as Festas do Barrio de San Pedro, en Santiago de Compostela, na segunda, e CUAC FM, a radio comunitaria da Coruña desde 1996, recibiu o galardón como medio de comunicación.
🟪🟧🟦EN VINTE🟪🟧🟦
- Entrevista | De Ninghures: «A nosa música axuda a que a xente diga "que guapa é a miña cultura"»
- Entrevista | Sabela: "Encantaríame que Galicia liderase unha vangarda ecoloxista"
- Entrevista | Nadie González: «No escenario hai que ser unha xefa, ou polo menos que a xente o pense»
- "E se queres". Faia aloumiña os ouvidos
Leilía foron as protagonistas da recta final da gala, na que recibiron un aplauso longo e cálido para o Premio Honorífico 2025
O discurso da directiva de Músicas ao Vivo levantou aplausos ao apuntar que os artistas non poden quedar á marxe de situacións que afectan á cidadanía como o proxecto de Altri e, no ámbito global, o xenocidio israelí. Xa en referencia ao sector musical, Músicas ao Vivo reclamou fortalecer a contratación de proxectos galegos na programación cultural do país. "É preciso poñer aos músicos e músicas no centro porque somos os que facemos a música. E non descoidar ao público e a obriga de facilitar o acceso á cultura a todos os cidadáns, con independencia de onde vivan ou dos recursos dos que dispoñan", sinalaron.
Ana Rodríguez, Patricia Segade, Mercedes Rodríguez, Montse Rivera, Felisa Segade e Rosario Rodríguez, as voces e pandeiretas de Leilía, foron as protagonistas da recta final da gala, na que recibiron un aplauso longo e cálido para o Premio Honorífico 2025. O presidente das Bodegas Martín Códax, Xoán Allegue, foi o encargado de entregárllelo xunto á directiva de Músicas ao Vivo representada por Sheila Patricia, presidente, Patty Castro, Silvia Penide e Tomás Díez.
Premios
- Metal e heavy: Brutal
- Canción Autor/a: A Pedreira
- Blues, Funk e Soul: Helena Egea
- Electrónica: Rumia
- Rock e punk: Os John Deeres
- Músicas urbanas: Nadie González
- Orquestras, Grupos e Músicas de Verbena: A Banda da Balbina
- Música Clásica e Contemporánea: María Domínguez
- Jazz e Músicas Improvisadas: Orquestra Galega de Liberación
- Pop e Indie: Sabela
- Músicas do Mundo e Mestizaxe: Fanfarria Taquikardia
- Música Infantil: Brais das Hortas
- Folk: De Ninghures
- Música Tradicional: Faia
- Bandas de Música Popular: Banda de Música Municipal de Caldas de Reis
- Artista Emerxente: Paracetafolk
- Salas: Sala Rebullón
- Festivais: Festas do Barrio de San Pedro (Santiago de Compostela)
- Proxectos de Comunicación e Difusión: Cuac FM
- Premio Honorífico 2025: Leilía
