O certame volve ás súas datas habituais da primavera e a súa 19ª edición terá lugar entre os días 18 e 21 de maio
O Festival de Cans regresa á normalidade. Despois de dous anos de pandemia nos que tivo que celerarse nos meses de agosto e setembro, o certame volve ás súas datas habituais da primavera e a súa 19ª edición terá lugar entre os días 18 e 21 de maio. O festival volverá coincidir co que se celebra na localidade francesa de Cannes, que neste 2022 se desenvolve entre o 17 e o 28 de maio.
Este regreso "ás orixes" está a marcar os sucesivos adiantos da imaxe gráfica e da programación do festival que os seus organizadores veñen debullando nas últimas semanas. Será un festival ao sol, que destaca no cartel realizado por Rei Zentolo, e definido outravolta pola calor humana, co retorno dos escenarios tradicionais de proxección preto da súa capacidade habitual.
Cans homenaxeará a Margarita Ledo por unha obra "caracterizada pola defensa da lingua, a visibilidade das mulleres anónimas e a intención de reconstruír a identidade dun país rescatando a memoria borrada"
Aínda non se coñece a programación completa, pero xa podemos saber algunhas das citas obrigadas do festival. Unha delas será a homenaxe se que se tributará á cineasta, escritora e investigadora Margarita Ledo Andión, que recibirá a distinción de Honra do festival, o Premio Pedigree. A organización do certame destacou a importancia dunha obra "caracterizada pola defensa da lingua, a visibilidade das mulleres anónimas e a intención de reconstruír a identidade dun país rescatando a memoria borrada".
Ledo recibirá o Can de Pedra e colocará a súa estrela no Torreiro das estrelas, nunhas xornadas nas que se poderá ver unha retrospectiva da súa creación de curtametraxes e narrativa experimental, rescatando tamén algunha obra inédita.
O outro nome propio da edición número 19 é a do realizador portugués João Nicolau, un dos expoñentes máis brillantes do novo cinema luso
O outro nome propio da edición número 19 é a do realizador portugués João Nicolau, un dos expoñentes máis brillantes do novo cinema luso. Nicolau realizou ata o de agora tres filmes, que se poderán ver en Cans e que foron estreados en certames de gran prestixio como Cannes, Venecia, BAFICI de Bos Aries, Locarno ou Sevilla: A espada e a rosa (2010), John From (2015) e Technoboss (2019). O director estará presente en Cans, onde o público poderá conversar con él sobre os seus filmes, e tamén sobre as súas curtametraxes, das que o festival ofrecerá unha sesión, con Rapace (2006), Cançao de Amor e Saúde (2009) e Gambozinos (2013).
João Nicolau estará presencialmente en Cans na fin de semana máis intensa do festival onde será o convidado do encontro Café Dromedario con CREA, organizado en colaboración coa asociación de directoras e directores galegos. Tamén ofrecerá ao público un avance do seu novo filme en posprodución, John in Christ.
O documental Miedo al miedo narra como Eme se enfronta á ansiedade antes de saír a pinchar
Tamén destaca a aposta do festival polo documental musical. En Cans poderá verse por primeira vez en Galicia Miedo al miedo, dirixido por Menchu Esteban, sobre a dj galega Eme DJ, e La historia de un cantante de pub, de Óscar Vilanova, no que se repasa a traxectoria de Litus Ruiz, líder da banda do Late Motiv, que actuará no Invernadoiro de Cans acompañado do vigués Pablo Novoa. Antes desa actuación, o Invernadoiro será tamén escenario da performance musical de Javi Álvarez, creador multidisciplinar máis coñecido por ser unha das metades, xunto co Jevi, do grupo Fluzo.
Cans acollerá a performance musical de Javi Álvarez, máis coñecido por ser unha das metades, xunto co Jevi, do grupo Fluzo
O documental Miedo al miedo narra como Eme se enfronta á ansiedade antes de saír a pinchar. Hai uns anos confesou no seu primeiro libro Mamá, quiero ser DJ que sufría ansiedade cada vez que subía a unha cabina e se expoñía ante o público. Mesmo chegou a padecer ataques de pánico que a obrigaron a cancelar actuacións. Desde entón, fala abertamente sobre a saúde mental, tanto en entrevistas como nas súas redes sociais.
Dende este martes poden adquirirse as entradas para as sesións de proxección e performance musical de Javi Álvarez, o pase do documental e o concerto de Litus no Invernadoiro
A piques de esgotarse o primeiro pack de 200 entradas, á venda ata o 26 de abril ou ata finalizar a oferta, este martes poden adquirirse xa as entradas para as sesións de proxección e performance musical de Javi Álvarez, o pase do documental e o concerto de Litus no Invernadoiro. Serán unicamente 100 as localidades dispoñibles para este espazo a un prezo de 5 euros. Todas as entradas, tanto para as proxecións nos jalpóns como para os concertos, poden adquirirse na tenda en liña do Festival de Cans.