O certame celebrará a súa XIX edición entre o 18 e o 21 de maio de 2022, volvendo a coincidir en datas co Festival de Cannes francés, como xa é tradición

A pandemia obrigou a suspender ou aprazar un gran número de citas culturais. Outras puideron levarse a cabo, pero con formatos reducidos, maiores medidas de prevención e seguridade e, en ocasións, en datas distintas ás habituais. Foi o caso do Festival de Cans, que nos anos 2020 e 2021 mantivo a celebración do certame, pero desprazándose dende o mes de maio aos de agosto e setembro, debido á difícil situación sanitaria que se vivía na primavera.

Porén, o festival do Porriño vén de anunciar que no 2022 regresará á primavera, ao seu tempo habitual, de xeito que a XIX edición se celebrará -se a situación da pandemia así o permite- entre o 18 e o 21 de maio, volvendo a coincidir en datas co Festival de Cannes francés, como xa é tradición. As datas foron decididas pola asemblea da Asociación Cultural Arela, entidade organizadora do certame, e foi xa comunicado nos últimos días a veciñas e veciños, institucións e empresas patrocinadoras.

A pesar da COVID, puido levar a cabo as dúas últimas entregas, desprazadas aos meses de agosto e setembro, mantendo calidade e éxito de público, con 7.500 persoas asistentes neste 2021

Dende a organización destacan que, a pesar das dificultades introducidas pola COVID nos dous últimos anos, o festival puido levarse a cabo con normalidade, chegando a 7.500 persoas na edición 2021. Desta cifra, unhas 6.000 persoas asistiron de xeito presencial ás proxeccións, concertos e actividades do festival, e outras 1.500 persoas conectáronse de xeito virtual a algunha das seccións de curtametraxes ou coloquios en streaming. A pesar da mellora na situación sanitaria, o Festival manterá nas vindeiras edicións estas canles de acceso virtual aos seus contidos. 

Neste ano activou o ciclo “Cinemaldea”, que levou unha selección das curtametraxes premiadas en Cans a todas as parroquias de O Porriño

Así mesmo, neste ano activou o ciclo “Cinemaldea”, que levou unha selección das curtametraxes premiadas en Cans a todas as parroquias de O Porriño, acadando a cifra de 250 persoas que asistiron presencialmente a estas proxeccións, co ánimo de achegar o cinema ó rural. En total, o Festival realizou este pasado ano 121 contratacións laborais e contratou servizos a case 50 empresas locais, ademais de contratar directamente 140 habitacións a diferentes establecementos hoteleiros.

A organización destaca que está a traballar "coa máxima prudencia"

Nos vindeiros días abrirase o prazo de envío de curtametraxes o obras a concurso. En todo caso a organización destaca que está a traballar "coa máxima prudencia", pois "a experiencia adquirida nas dúas últimas edicións leva á organización a traballar en paralelo cunha marxe para tomar decisións en cada momento, de acordo co que vaia determinando as autoridades sanitarias"