Ugia Pedreira e Óscar Górriz dirixen a nova oferta formativa nada no marco da celebración do 50º aniversario da Escola de Gaitas de Ortigueira, xermolo do festival
En 1975 Xabier Garrote fundou a Escola de Gaitas de Ortigueira e con ela facía xermolar tamén o Festival Internacional do Mundo Celta. Medio século despois, neste 2025 o festival celebra o aniversario da escola ampliando ata cinco días, do 9 ao 13 de xullo, a duración dun evento musical que dende hai anos vai moi alén dunhas poucas xornadas do verán e que desta volta medra pola banda da formación e a creación co nacemento do Laboratorio de Cántigas Novas, (O LAB).
Ugia Pedreira e Óscar Górriz codirixen un proxecto que bota a andar o vindeiro marzo e que, cada dous sábados ata o festival, onde se presentarán as cancións compostas, quere virar en "espazo para a exploración, para a experimentación", onde "gozar e aprender do proceso creativo cun fin común: a construción de novas cancións"; "propoñémonos abrir a cociña e cociñar entre todas e todos, independentemente do nivel ou capacidades", explicou Pedreira este venres na presentación d'O Lab no Museo do Pobo Galego.
O Lab, detalla Ugía Pedreira, proponse "entrar no basal da música tradi", isto é, "elaborar e reelaborar cántigas, melodías e historias musicadas". Crear novas cantigas, pero "nutríndonos tamén da comunidade que nos acolle, a de Ortigueira. Recolleremos recursos e inspiracións na lírica e poética da saborosa lingua galega". Porque "vimos, como pobo, de amplas sagas de compositoras, desde a neve dos tempos. Non é baladí que botemos por fora en creatividade, artistas diversos, poetas e premios", resalta.
Cada dous sábados dende marzo e ata o inicio do festival, en xullo, o Lab vai "elaborar e reelaborar cántigas, melodías e historias musicadas" que tamén se van "nutrir da comunidade que nos acolle". O proxecto, subliñan, "ten moito que ver coas tan merecidas depositarias do Día das Letras" deste 2025
Este laboratorio para "crear patrimonio inmaterial desde un norte galego paradisíaco cargado de simbolismos, de patrimonio en pedra, natural, arquitectónico" nace no ano no que o Día das Letras Galegas homenaxea a poesía popular e as cantareiras que a impulsaron e termaron dela. O presidente da Real Academia Galega, Víctor Freixanes, encadra o Laboratorio de Cántigas Novas na "celebración desa riqueza".
"Ata a propia Rosalía de Castro sen as cantigas populares, sen isto que estamos celebrando este ano, Cantares Gallegos non existiría, a nosa canción popular non existiría", ilustra Freixanes para explicar que "este tipo de celebracións nacen ás veces aparentemente de forma anónima, con pouca proxección social" pero dan en ser "eventos de primeiro nivel". O Festival de Ortigueira, destaca, é boa mostra e o Laboratorio, enfatiza o alcalde de Ortigueira, Valentín Calvín, ten "moito que ver coas tan merecidas depositarias do Día das Letras Galegas".
Sesións creativas enfocadas á creación tanto colectiva como individual, sesións de mestría con profesionais expertos en etnomusicoloxía, historia da música galega, improvisación, harmonía e arranxos e tamén sesións comunitarias con conversas, roteiros e foliadas compoñen o programa dun curso que ten abertas as inscricións ata o 24 de febreiro a través do correo electrónico lab@festivaldeortogueira.com. A formación custa 200 euros e está "aberta a calquera persoa con interese na creación, composición ou interpretación da lírica popular galega".
