"A delicada situación económica" que atravesa a entidade, cualificada como "de emerxencia", podería "comprometer a súa continuidade a curto prazo", informa a directiva do club
Hai uns días consumouse o descenso á segunda categoría do Burela Futbol Sala, o equipo que chegou a ser o mellor equipo do mundo e que dende o 2009 obtivo 6 Ligas, 7 Copas da Raíña, 6 Supercopas e dous trofeos continentais, entre eles a Champions en 2021. O descenso foi consecuencia directa da quebra do seu patrocinador, Pescados Rubén, a finais do ano 2024, unha situación que deixou a entidade sen os recursos necesarios para competir ao máximo nivel.
Nese momento sinalábase que, en todo caso, o clube tiña garantida a continuidade nesta segunda división (categoría na que tamén se atopa o equipo masculino), apoiado nunha canteira que tamén traballou con dedicación durante estes anos.
O club realizou unha "solicitude formal de apoio" á Deputación de Lugo e á Xunta de Galicia. Ademais, está a manter contactos con empresas privadas e traballa na posta en marcha de "iniciativas de financiamento colectivo"
Porén, este venres a xunta directiva do o Burela Fútbol Sala fixo pública "a delicada situación económica que atravesa a entidade", cualificada como "de emerxencia" e que podería "comprometer a súa continuidade a curto prazo". A situación foi comunicada a socios e socias nunha asemblea na que se detallou a grave situación creada polas "obrigas financeiras derivadas de pólizas e préstamos formalizados no ano 2020, incluídas na débeda histórica adquirida da xestión anterior a 2025".
Un dos principais riscos identificados é "o aviso de demandas polo incumprimento destes produtos bancarios, o que impediría afrontar pagamentos esenciais como Seguridade Social ou impostos e provocaría o cesamento da actividade da entidade laranxa".
A xunta directiva fai "un chamamento á responsabilidade colectiva para asegurar o futuro dunha entidade referente no deporte galego"
O presidente do club indica que xa se realizou unha "solicitude formal de apoio" á Deputación de Lugo e á Xunta de Galicia, ben en forma de patrocinio ben de financiamento. Ademais, o club está a manter contactos con empresas privadas e traballa na posta en marcha de "iniciativas de financiamento colectivo". Por exemplo, vai iniciar unha campaña de doazóns a través da Fundación Imdecum co obxectivo de mobilizar o apoio social e deportivo ao proxecto baixo o lema "25 anos de Historia. Corazón e Resistencia".
O equipo feminino, que chegou a ser considerado o mellor do mundo e gañou unha vintena de títulos, entre eles dous continentais, descendeu a Segunda División hai unhas semanas
A xunta directiva afirma que a viabilidade do club para a próxima tempada "dependerá directamente do éxito das xestións abertas nas próximas semanas, tanto no ámbito institucional coma no privado". Indica, igualmente, que mantén un "compromiso coa transparencia" e que a súa prioridade é "manter os pagamentos ao persoal e provedores". Finalmente, fai "un chamamento á responsabilidade colectiva para asegurar o futuro dunha entidade referente no deporte galego".
