Unha ducia de estampas galegas no V centenario da Habana
O 16 de novembro a cidade da Habana celebra o seu V centenario. Nestes cinco séculos son moitas as relacións entre a urbe e Galicia. Repasamos unha ducia desas estampas, algunhas das cales están presentes na exposición O soño cubano da emigración galega, organizada na capital cubana polo Consello da Cultura Galega.
-
01O Centro Gallego
Creado en 1879, o centro foi lugar de encontro para unha emigración galega que chegou a ser o 9% da poboación total da cidade da Habana. A que foi a súa sede é hoxe o actual Gran Teatro da Habana.
-
02O himno
O Gran Teatro da Habana, sede do Centro Gallego, foi o lugar no que se estreou o 20 de decembro de 1907 o Himno Galego.
-
03Negra Sombra
Tamén o poema de Rosalía foi musicalizado e interpretado por primeira vez na Habana en 1892.
-
04Caixa de aforros
En 1906 o Centro Gallego chegou a crear a súa propia caixa de aforros, que o Consello da Cultura Galega lembra na súa mostra con esta imaxe.
-
05As publicacións
Ducias de xornais e publicacións galegas viron a luz na Habana. O Consello da Cultura Galega tenas catalogadas no Repertorio da prensa galega da emigración.
-
06Curros Enríquez
Un dos moitos xornais galegos da Habana, La Tierra Gallega, foi dirixido por Curros Enríquez, emigrado en 1894 a aquela cidade, onde morreu en 1908.
-
07Chané
Tamén na Habana morreu, en 1917, o compositor José Castro González, Chané.
-
08Neira Vilas
Na Habana pasou parte da súa vida o escritor Xosé Neira Vilas.
-
09Fidel Castro
Fillo de galegos, o 8 de xaneiro de 1959 a súa entrada na Habana simbolizou a vitoria da súa revolución contra a ditadura de Batista.
-
10Manuel Fraga
A familia de Fraga viviu en Cuba e o presidente da Xunta nunca ocultou a súa simpatía pola illa e mesmo por Castro, ao que preparou unha queimada na Habana.
-
11Touriño
Tras Fraga, os seguintes presidentes da Xunta tamén visitaron A Habana, como Touriño en 2007 para conmemorar o centenario do Himno Galego.
-
12Feijóo
Malia criticar a viaxe de Touriño cando estaba na oposición, Feijóo tamén visitou A Habana, en dúas ocasións, evidenciando que a relación de Galicia con Cuba está por riba das diferenzas políticas dos respectivos gobernos.