Unha ducia de libros en galego máis lidos nos clubs de lectura escolares

Golpes de Luz (Ledicia Costas)

Ledicia Costas é a raíña dos clubs de lectura escolares. É a autora máis lida e tamén é responsable da obra máis escollida durante o pasado curso 2021-22, segundo os datos fornecidos pola Consellaría de Cultura. Foi Golpes de Luz (Xerais), presente en 38 clubs. A obra está protagonizada por Xulia, que é xornalista e acaba de separarse, polo que regresa a Galicia co seu fillo Sebas.

Identidade (Nee Barros)

O segundo libro en máis clubs de lectura é Identidade, de Nee Barros (Galaxia), "unha obra de teatro que fala da liberdade, da necesidade de ser e, sobre todo, da identidade"

22 segundos (Eva Mejuto)

Segue a lista con 22 segundos, de Eva Mejuto (Xerais), "unha obra que busca visibilizar, desde a empatía, un colectivo de persoas historicamente silenciadas e denigradas que loita por que as leis -e a sociedade- deixen de consideralas enfermas".

Eva Mejuto, gañadora do Premio dos Clubs de Lectura no ano 2021, foi a cuarta autora máis lida nos clubs de lectura o pasado curso. Conta, ademais, con outra obra entre as máis destacadas: Memoria do silencio

Senlleiras (Antía Yáñez)

Senlleiras, de Antía Yáñez (Galaxia), gañou o Premio Illa Nova de Narrativa no ano 2018 e o pasado curso foi o cuarto libro máis lido nos clubs de lectura escolares. No libro, unha influencer sobe unha foto ás redes sociais onde aparece unha man fantasma. Xusto unha semana máis tarde, a moza é atopada morta. A partir deste fío técense as vidas de varias mulleres de diferentes séculos.

Yáñez, ademais, foi a terceira autora máis lida, grazas tamén a obras como Plan de rescate

Escarlatina, a cociñeira defunta (Ledicia Costas)

Ademais de Golpes de Luz, Ledicia Costas ten outras catro obras entre as 13 máis lidas nos clubs escolares: Escarlatina a cociñeira defunta, Jules Verne e a vida secreta das mulleres planta, A balada dos unicornios e A señorita Bubble. Ademais, Infamia pecha a lista das 50 máis lidas. Ledicia Costas gañou, ademais, o Premio dos Clubs de Lectura no ano 2016, na súa segunda edición.

Virtudes (e misterios), de Xesús Fraga

Virtudes (e misterios), de Xesús Fraga (Galaxia) tamén aparece entre as obras lidas en máis clubs de lectura. Premio Blanco Amor en 2019 e Premio Nacional de Narrativa e Premio da Crítica de Galicia en 2021, Fraga conta aquí a emigración desde a parte dos retornados, nunha historia "dos que marchan que, cando regresan, nin eles son os mesmos nin a terra que deixaron é a mesma".

O neno do pixama a raias (John Boyne)

Un clásico dos clubs de lectura na última década é O neno do pixama a raias, de John Boyne (Faktoría K), unha novela publicada no ano 2006 e traducida a 42 linguas. O libro conta a historia de Bruno, un neno de nove ano fillo dun comandante ao cargo dun campo de concentración nazi.

A cidade do átomo (Iria Misa)

Moito máis recente é A cidade do átomo, de Iria Misa (Xerais), Premio Agustín Fernández Paz pola Igualdade no ano 2021. No libro, tras a explosión no reactor 4 da planta nuclear de Chernóbil, Lena Petrova, busca a súa mellor amiga, Svetlana, e agarda con ansia o regreso da súa nai. Iria Misa é autora tamén de Mamá, quero ser Ziggy Stardust, igualmente na lista das obras preferidas nos clubs de lectura.

Subnormal (Fernando Llor e Miguel Porto)

Entre as obras máis lidas nos clubs de lectura atopamos tamén unha novela gráfica, Subnormal, de Fernando Llor e Miguel Porto, publicada en galego por Retranca Editora. O libro relata a historia real do bullying que sufriu o xxogador de baloncesto da ACB Iñaki Zubizarreta, mesmo a pesar do seu físico portentoso.

A folla azul (Andrea Maceiras)

Andrea Maceiras, premio dos clubs de lectura no ano 2020, foi a quinta autora máis lida o pasado curso, grazas a obras como O que sei do silencio e, sobre todo, A folla azul (Xerais), Premio Merlín de Literatura Infantil 2020. A historia, que ten lugar na Amazonia, está protagonizada por Husu Aké, "membro da tribo dos Tacaré, filla da Nai Terra e habitante do mundo verde"

Os nenos da varíola (María Solar)

Os nenos da varíola, de María Solar (Galaxia), relata a historia da expedición do doutor Balmis, na que 22 nenos de 3 a 9 anos, sacados dos hospicios da Coruña, Santiago e Madrid, transportaron nos seus corpos a vacina da varíola ás colonias españolas en América, nun barco que partiu dende A Coruña e baixo o coidado da enfermeira Isabel Zendal. A obra de Solar achégase a "unha das aventuras máis importantes da historia da humanidade, protagonizada por uns nenos que non tiñan idea de facerse heroes".

Cartas de inverno (Agustín Fernández Paz)

Cartas de inverno é a vixésima obra máis lida o pasado ano, pero pecha esta lista como homenaxe e lembranza a Agustín Fernández Paz, o autor galego máis lido nas últimas décadas, de forma moi destacada nos clubs de lectura, onde segue a ser un referente. De feito, no curso 2021-22 Fernández Paz foi o segundo autor máis lido nestes espazos, só por detrás de Ledicia Costas. Foi, ademais, o gañador do Premio dos Clubs de Lectura no ano 2015, na súa primeira edición.