Alcoa acusa os gobernos no xulgado de "presionar" para unha venda da planta da Mariña que "non é a panacea"

Un intre da audiencia sobre as medidas cautelares en Alcoa, no TSXG CC-BY-SA Praza Pública

Alcoa ataca con dureza a Xunta e o Goberno central e argumenta que non se lle pode "obrigar a vender si ou si" a planta da Mariña sobre a que prevé un ERE e o despedimento de máis de 500 traballadores. E menos, segundo denuncia, cando o posible comprador formulou condicións "fóra da mesa de negociación, ilegais e con peticións desorbitadas de diñeiro", ademais de "non ter presentado ningún plan industrial nin de investimentos".

Alcoa carga contra Xunta e Goberno central e aclara que non se lle pode "obrigar a vender si ou si" a planta da Mariña 

A multinacional empregou estes argumentos, entre outros, na vista celebrada na sala do social do Tribunal Superior de Xustiza de Galicia (TSXG) na que pediu que se desestimase a petición de CIG, CCOO e UGT de medidas cautelares para paralizar o ERE na planta de Alcoa que afecta 524 traballadores. Os sindicatos, xunto ao comité de empresa, reclaman que se deteña o despedimento colectivo e se impida a parada das cubas de electrólise, o que faría inviable o reinicio da actividade segundo o persoal, algo que Alcoa tamén nega. 

Concentración do persoal de Alcoa en Lugo © CIG

A Consellería de Economía e o Ministerio de Industria interveñen na vista como "partes interesadas",  unha condición contra a que se manifestou o avogado da multinacional, que acusou as administracións de "parciais" e de "situarse totalmente en contra da empresa", o que as "deslixitimaría" para intervir nun proceso do que pediu que fosen "excluídas". 

Alcoa pide que os gobernos galego e español non interveñan como "partes interesadas" no proceso e acúsaos de actuar de maneira "parcial"

No seu escrito ao TSXG, os sindicatos reclaman a intervención ou administración xudicial dos bens produtivos e, xa que logo, da planta de aluminio por parte da Sociedade Estatal de Participacións Industriais (SEPI) durante o tempo que dure o proceso de impugnación do despedimento colectivo e ata que haxa sentenza firme. 

Ademais, piden que se ordene a Alcoa que evite executar os despedimentos e non deteña a produción de aluminio nin as cubas de electrólise na fábrica. En todo caso, a resolución do tribunal tardará aínda uns días logo da vista iniciada este mércores e despois do lóxico proceso de deliberación. 

Na audiencia, a estratexia de Alcoa para xustificar a súa negativa a deter o ERE parece clara. O seu letrado advertiu en varias ocasións da actuación "contraria á imparcialidade" da autoridade laboral e cargou contra Xunta e Ministerio de Industria, aos que considera "suxeitos imparciais" no proceso. Ademais, tamén en repetidas veces, censurou os, segundo dixo, continuos intentos das administracións por "obrigar a empresa a vender si ou si" por supor "un atentado contra os dereitos á propiedade privada e á liberdade de empresa". Respecto da acusación de "fraude de lei" no ERE presentado, o avogado advertiu dunha acusación "moi grave". 

"Obrigar a empresa a vender si ou si supón un atentado contra o dereito á propiedade privada e á liberdade de empresa", di Alcoa

Porque Alcoa, ante as críticas de traballadores e gobernos contra a súa actitude, tratou de virar o foco cara a Liberty House, grupo que negociou unha compra finalmente frustrada, á que acusou de "saír das marxes da negociación" e de ter como "único interese solicitar dereitos sobre a planta de alúmina", máis alá dunha posible compra da de aluminio, unha opción que a multinacional di que nunca estivo sobre a mesa. Culpou o grupo interesado do fracaso na negociación, acusándo de "desaparecer durante 14 días" e logo agocharse "tras da SEPI". 

A multinacional acusa a Liberty de ter como "único interese" a planta de alúmina e non a de aluminio e de "non presentar plan industrial nin de investimentos"

"Non pode obrigarse a unha empresa a vender porque a venda non é un plan social nin ten por que ser a panacea", argumenta Alcoa, que advirte de que "a venda a un terceiro non é unha solución porque si" e que se pregunta "por que" Liberty "vai ser capaz de facer rendible unha planta deficitaria se Alcoa non é quen de facelo". 

Foi aí cando o letrado da multinacional norteamericana cargou contra Liberty con dureza, acusándoa de "non presentar nunca o plan industrial e de investimentos" que prometera e de non ter "interese real" na planta de aluminio primario, senón na de alúmina, que Alcoa non puxo en venda. 

José Antonio Zan, presidente do comité de empresa da planta de Alcoa na Mariña, durante a audiencia no TSXG CC-BY-SA Praza Pública

Segundo a empresa, a última proposta no marco da negociación na que a SEPI exercía xa de mediador supoñía a compra da planta por 1 euro mentres Alcoa asumía un custo total de "130 millóns". "Puxéronse enriba da mesa e Liberty non quixo e pedía 170 millóns", advertiu o letrado, que cifrou en 32 millóns de euros o custo do despedimento colectivo que pretende e que acusou o grupo interesado na planta de reclamar no total da contribución económica para chegar a un acordo ata 90 millóns en previsión dun posible peche futuro.

Alcoa asegura que ofreceu 130 millóns para a venda da planta a Liberty, que "rexeitou": "Pedía 170"

Para Alcoa, a "presión" exercida polas administración para unha venda "entra en conflito" coa liberdade de empresa e o dereito á propiedade privada. Ademais, acusa os gobernos galego e español de "propiciar unha especie de pinza" contra a empresa, que di que non ten "intención nin de pechar nin de desmantelar a planta" e que asegura que os despedimentos son a maneira de "salvala". 

Alcoa advirte de que a vista "non é lugar para discutir as causas" do despedimento colectivo, pero insiste no elevado "custo enerxético", un problema "evidente e innegable". "É imposible operar a planta sen baixar o prezo da enerxía", di a empresa, que sitúa en "máis do 40%, entre 10 e 17 millóns de euros ao mes", os custos enerxéticos da compañía. Ademais, xustifica a "hibernación" das cubas por ser "o foco fundametnal das perdas da planta, de máis de 1 millón de euros por semana".

Alcoa asegura que "cantas máis toneladas se producen, máis se perde" na planta que, segundo o seu letrado, sumou perdas de 50 millóns en 2018, 61 en 2019 e que estima que chegarán aos 58 a final de 2020. "A causa é estrutural e non conxuntural", repetiu a empresa respecto dos 170 millóns de perdas nos últimos tres anos. "Se a planta fose rendible, todos os operadores do sector estarían pegándose para comprala pagando e non recibindo diñeiro", insistiu tras recordar que estas perdas son "severas e recorrentes" e que nelas non se inclúe "o impacto da folga" dos traballadores. 

Alcoa advirte de 170 millóns de perdas nos últimos tres anos: "É imposible operar a planta sen baixar o prezo da enerxía"

A multinacional, ademais, nega, como advirten persoal e administracións, que o apagado das cubas supoña a inviabilidade dun reinicio da actividade. No entanto, o presidente do comité de empresa, José Antonio Zan, que declarou como testemuña, alertou de que a falta de investimentos e as condicións dos transformadores provocaría "case seguro" a imposibilidade de reinicio e unha "catástrofe" na planta. 

Foi nunha tensa quenda de pregunta por parte do avogado de Alcoa, que antes xa censurara a actitude do comité de empresa durante as negociacións e mesmo durante as protestas, acusándoos de pór as restricións pola pandemia como escusa para evitar xuntanzas pero mobilizarse "con abrazos e incumprindo as medidas" na Mariña. 

Á saída da vista, o presidente do comité de empresa amosouse "seguro" de que serán concedidas as medidas cautelares porque porque “o argumento da multinacional é sempre o mesmo, que queren parar as cubas”.

Despece

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.