Goberno central e Xunta fan fronte común para deter o ERE en Alcoa e o persoal pide preparar xa a intervención

Mobilización de persoal de Alcoa na Mariña CC-BY-SA CCOO-Galicia

Hemeroteca

Goberno central e Xunta insisten, desta vez si, nunha fronte común para frear as intencións de despedimentos de Alcoa na Mariña, mesmo levándo aos tribunais. Ambas as dúas administracións aseguraron que acudirán á vía "xudicial, administrativa e laboral" para frear o ERE que pretende o despido de máis de 530 traballadores --que suporía a perda de emprego doutros tantos obreiros das auxiliares-- e poder garantir a produción de aluminio primario en San Cibrao. 

Goberno central e Xunta advirten de que acudirán á vía "xudicial, administrativa e laboral" para frear o ERE e Industria volve ameazar coa devolución das axudas

"Estamos analizando todos os instrumentos dispoñibles dentro do ordenamento xurídico e do marco da Comisión Europea para garantir o futuro industrial", dixo este martes no Senado a ministra de Industria, Reyes Maroto, que asegurou que malia a negativa de Alcoa, "o interese de Libery House por investir na planta continúa en pé e o seu proxecto grante o futuro da actividade". 

Mobilización de persoal de Alcoa na Mariña CC-BY-SA CC

Poucas horas despois, tras a celebración da mesa multilateral polo futuro de Alcoa na Mariña, o conselleiro de Industria, Francisco Conde, insistiu en que as dúas administracións traballan "en todas as alternativas posibles"  para “dar unha resposta administrativa, laboral e xudicial” ante un posible despedimento colectivo. 

Con todo, nin o Executivo central nin o autonómico fixeron referencia á intervención publica da planta, opción que o persoal --en folga indefinida desde o pasado domingo-- demanda como única alternativa para desatascar o conflito e evitar o peche definitivo. 

Xunta e Executivo central din traballar "en todas as alternativas posibles" pero non fan referencia á intervención pública da planta

Desde a Xunta e o Estado insístese no "máximo compromiso" cos traballadores para levar a cabo unha "resposta coordinada", tamén co persoal. Desde o Goberno central teiman en lembrarlle a Alcoa que calquera evidencia de incumprimentos por parte da compañía provocará a solicitude da devolución de todas as axudas públicas recibidas nos últimos anos. 

Agora, ambas administracións agardan polos movementos de Alcoa, que ten ata o vindeiro 13 de outubro para comunicar o despedimento colectivo. Mentres, o comité de empresa solicítalles que apuren xa os trámites para unha intervención inmediata no caso de que non haxa resposta positiva por parte da multinacional e advirten da importancia de que se cumpra co compromiso de "non parar as cubas" en ningún momento. 

Despece

  • Feijóo responde a Pontón que é partidario de intervir Alcoa San Cibrao se queda acreditada a "mala fe" da empresa

    Ana Pontón, reunida con persoal de Alcoa no Parlamento este 7 de outubro de 2020 CC-BY-NC-SA BNG

    D.L.

    "De nada valen reunións sen conclusións; a intervención pública é legal e posible". A portavoz nacional do BNG, Ana Pontón, instou este mércores o presidente da Xunta, no marco da sesión de control no Parlamento, a aclarar de vez se é ou non partidario da intervención pública na planta de Alcoa en San Cibrao, despois de que a multinacional fixese saltar polos aires as negociacións de venda ao grupo Liberty con "chulería", facendo ver que cre estar "por riba dos gobernos".

    Na súa resposta, inzada de críticas ao Bloque polo que cualifica de "posición totalmente insatisfactoria" e porque no Goberno de España "non lle fan nin caso", Feijóo asegurou non "descartar nada". Dende as eleccións de xullo, asegura, "todo cambiou" e os Gobernos de España e de Galicia están "aliñados no mesmo obxectivo", que Alcoa acceda á venda. E se non accede e "está, de forma continuada" actuando "de mala fe", a "intervención é unha solución".

    Ana Pontón: "De nada valen reunións sen conclusións; a intervención pública é legal e posible"

    Neste sentido, lembra Feijóo que ambos Executivos abordaron a posibilidade de que a Sociedad Estatal de Participaciones Industriales (SEPI) mercase temporalmente o complexo de Alúmina-Aluminio para despois "trasladalo" a Liberty. "O Goberno central está traballando dende xullo para poñer enriba da mesa unha solución, non me doen prendas", admite o popular.

    Para Pontón, "hai que ter a cara de cemento armado" para "dicir que o BNG non estivo á altura defendendo o persoal de Alcoa", máis aínda "vindo dun representante do PP, cando o seu partido que puxo en marcha un marco enerxético [no Goberno central] que puña contra as cordas as nosas industrias electrointensivas". Sexa como for, conclúe a líder do Bloque, "estamos no tempo de desconto". "O persoal e a comarca estiveron á altura; agora é momento de que Xunta e Goberno central dean a talla", advertiu a líder nacionalista, que se reuniu no Pazo do Hórreo con representantes dos traballadores.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza