O impulso da campaña estival e da contratación na hostalería e no turismo en Galicia volve tirar do mercado laboral, sacando 2.000 persoas do Expediente de Regulación de Emprego Temporal (ERTE) nas dúas primeiras semanas de agosto.
Segundo os datos do Ministerio de Inclusión, Seguridade Social e Migracións, no último día do pasado mes de xullo atopábanse en situación de ERTE --parcial ou temporal-- en Galicia 13.011 persoas, mentres que a 13 de agosto eran xa pouco máis de 11.000 (11.083).
No entanto, neses 13 primeiros días do presente mes de agosto tan só se crearon 546 empregos, que foi o incremento no número de afiliados á Seguridade Social.
A saída do ERTE de traballadores que oficialmente non contan como desempregados foi a opción maioritaria, máis tendo en conta que estes expedientes abranguen maioritariamente o sector servizos e ocupacións --como a hostalería-- que sufriron un importante impacto pola COVID.
Pola contra, desde o último día do mes de xuño e ata o 13 de agosto, unhas 7.700 persoas saíron do ERTE en Galicia, que creou nese período de tempo 23.120 empregos, a maioría deles no sector servizos, afondando nun mercado laboral que engorda con temporalidade e precariedade no verán pero adelgaza no sector industrial.
De feito, segundo os últimos datos da EPA, de compararmos con hai un ano, a industria destruíu 14.700 empregos, fronte aos 35.000 que gañou o sector servizos ou os 6.300 nos que aumentou na construción.
