O programa ′Reiníciate. Enfoca o teu futuro′ da Deputación de Lugo e a Escola de Organización Industrial (EOI) busca fomentar a inserción laboral da xuventude da provincia de Lugo. Cunha vintena de cursos de formación en marcha e con prácticas remuneradas, este programa converteuse nunha opción ben recibida entre a mocidade para completar os seus estudos e atopar traballo no que máis lles pode interesar.
"Hai xente nova con moito medo ao mercado laboral. Por iso acompañamos en todo o proceso e mesmo facemos simulacros de entrevistas de traballo"
″Hai xente nova que lle ten moito medo ao mercado laboral porque pensa que non ten a formación suficiente ou non vai saber facer as cousas. Por iso os acompañamos en todo o proceso e facemos un seguimento das entrevistas de traballo que lles van xurdindo″, explica unha das técnicas do departamento de empregabilidade de ′Reiníciate. Enfoca o teu futuro′.
A pandemia non diminuíu o interese pola formación, por iso mantiveron os cursos online. Unha modalidade que aínda non abandonaron porque hai moita mocidade das zonas rurais de Lugo que se está a apuntar e ten máis complicado achegarse á cidade para as clases. O programa está desañado para persoas entre os 16 e os 30 anos, pero os perfís predominantes están nos primeiros vinte e teñen estudos previos de FP.
Ademais, ofrécenlles unha formación para afrontar as entrevistas de traballo e os procesos de selección das empresas. ″Facemos simulacros de entrevistas, é algo que está a funcionar moi ben. Despois, cando van ás entrevistas das ofertas que se lles envían, tamén facemos un seguimento coa empresa para saber como lles foi e que cousas podemos mellorar″, explica a técnica. Están logrando a inserción laboral do 26% do alumnado que pasa polo programa.
Iria, titulada en FP Superior de márketing e publicidade, traballa nunha empresa de Lugo como community manager tras formase na materia co programa Reiníciate
Iria Posada soubo do programa ′Reiníciate. Enfoca o teu futuro′ a través da prensa. ″Teño un FP superior de márketing e publicidade e vin que había un curso de community manager que encaixaba moi ben coa miña formación″, conta. Traballaba en Vilalba nunha empresa moi pequena na que facía de todo menos o que lle tocaría pola súa titulación, polo que deu o paso e anotouse á formación que ofertaba a Deputación. ″Estou moi contenta porque o curso me pareceu que estaba moi ben en contidos e o campus virtual pareceume moi intuitivo. Recomendaríalle a toda a xente nova que mire estes cursos porque ademais teñen prácticas remuneradas″, engade.
Agora está a traballar nunha empresa de Lugo que a contratou en xaneiro como community manager. ″É un cambio importante, agora estou coas redes sociais, coa páxina web e tamén fago estratexias de márketing″, di. Como Iria, Angie Lorena Cortes tamén está a traballar despois de facer un dos cursos do programa ′Reiníciate′. Anotouse ao curso de márketing e comercio porque no seu país de orixe, Colombia, xa traballara neste eido. ″Foi unha boa experiencia. Gustaríame seguir formándome e facer outro curso máis adiante″, asegura.
"As empresas saben que sen presenza en internet non existen e precisan perfís que a saiban xestionar"
″Un dos maiores problemas que temos como cidadáns é que non estamos afeitos usar a documentación en formato electrónico en lugar do formato físico, tampouco a comunicarnos a través de plataformas virtuais ou rexistros telemáticos polo que o curso axudoume a comprender que non é tan difícil, que se aforra en prazos e tamén existe apoio técnico para este tipo de operacións″, detalla Adela Paz, alumna do curso de Auxiliar de xestión informática especializado en licitacións e asociacións, que atopou traballo grazas a esta formación.
″Hai moito alumnado de FP en Comunicación e márketing ou de Administración e finanzas que aproveita estes cursos para ter unha formación a maiores que os diferencie do resto, pois son cursos de FP moi demandados hoxe. Tamén é certo que as empresas agora saben que se non teñen presenza na internet non existen e precisan perfís que saiban xestionar isto″, salienta a técnica do programa. Toda a información do programa está dispoñible no seu sitio web.
