As exportacións de Galicia a Estados Unidos sumaron 800 millóns de euros en 2024, o 2,6% do total
O Consello da Xunta deste luns analizou un informe elaborado pola Consellería de Economía e Industria que calcula nuns 200 millóns de euros o custo para as empresas galegas se Estados Unidos implanta aranceis xerais do 25%, segundo o anunciado polo seu presidente, Donald Trump.
Segundo informou o presidente Rueda, a análise realizada pola Xunta parte do anuncio de Trump, aínda pendente de concretarse, de implantación de aranceis xerais do 25% aos produtos da Unión Europea. En Galicia, segundo os seus datos, "un milleiro de empresas" exportan a Estados Unidos, das cales 350 o fan "de xeito regular", como mínimo nos últimos cinco anos, fundamentalmente aluminio, viño e bens de consumo como produtos máis representativos.
350 empresas galegas exportan a Estados Unidos de xeito regular, principalmente aluminio, viño e bens de consumo
As exportacións totais de Galicia a Estados Unidos sumaron o pasado ano 800 millóns de euros, o 2,6% do total de exportacións do ano, que acadaron un novo récord con 31.000 millóns de euros. É da aplicación xeral do 25% de aranceis a ese volume de exportacións de 800 millóns de onde saca a Xunta o impacto de 200 millóns de euros.
Ademais desta cuantificación, Rueda tamén anunciou que a Xunta activará un "observatorio" dos aranceis estadounidenses a través da antena empresarial que o Instituto Galego de Promoción Económica (IGAPE) ten en Miami, que ofrecerá "asesoría e apoio técnico" ás empresas interesadas.
