Segismundo García acudiu este xoves á factoría de Cervo, á que o persoal non puido entrar a traballar e onde se desprazou unha representación da inspección
A xornada laboral comezou ante o complexo de Sargadelos en Cervo co persoal da fábrica cerámica tentando acceder aos seus postos de traballo. Ata as 6 da mañá, a factoría continuara funcionando co ritmo normal pero de aí en diante a empresa comezou a executar o peche patronal anunciado polo propietario da compañía, Segismundo García, para non cumprir coas esixencias da Inspección de Traballo en materia de saúde laboral.
Outra denuncia ante a Inspección, formulada por Comisións Obreiras, é precisamente o que xa ten sobre a mesa García, que na mañá deste xoves acudiu ás instalacións cervenses, segundo puido confirmar Praza.gal. Pouco antes das once da mañá tamén continuaban no interior do histórico recinto representantes da propia inspección. Tras esa visita, contra a fin da mañá, o propio persoal confirmaba que García, cando menos aparentemente, recúa e está disposto a reabrir.
Membros do persoal que por temor a represalias reclaman preservar o seu anonimato agardaban que unha eventual conversa directa entre inspección e propietario puidese dar como resultado algunha novidade favorable. Cando menos, encarreirar pola senda do procedemento legal unha clausura de actividade que, de entrada, sería alleo a calquera normativa. Por ese motivo, as traballadoras e traballadores quixeron deixar constancia formal de que acudiran a traballar asinando un documento e avisando á Garda Civil.
"Os traballadores son a arma arreboladiza" dun empresario "que non pode dicir que non quere cumprir a lei e por iso pecha", advirte o responsable de Industria de CCOO na comarca dende a propia fábrica
"Calquera cousa que queira facer ten que estar argumentada, o que non se pode é dicir que esta empresa non quere cumprir o que teñen que cumprir todas e pecha", resume en declaracións a Praza.gal o sindicalista José Antonio Zan, responsable de Industria de CCOO na comarca. Ás portas de Sargadelos, Zan subliña que neste caso "o problema" non é que Segismundo García non queira pagar unha multa que, polo seu importe -5.000 euros-, é unha cuestión menor para o grupo empresarial.
A cuestión, enfatiza Zan, é que "ten que cumprir a lei, coma o resto de empresarios". Para garantir a seguridade laboral do persoal e tamén para, se é o caso, cesar a actvidade. "E aquí non hai ningún procedemento de despedimento colectivo, ningún expediente" nin ningunha outra figura legal semellante.
O representante sindical tamén advirte de que "o órdago" do propietario de Sargadelos non está sendo lanzado en realidade ao persoal da fábrica de Cervo. "Os traballadores son a arma arreboladiza", pero "a pataca quente" tena a Consellería de Emprego como autoridade laboral e, en última instancia, o Goberno galego no seu conxunto e "o señor Rueda" en particular. O presidente, coida, debera aclarar se "vai permitir que un empresario vaia polo mundo facendo o que lle dea a gana ou vai apoiar a cidadanía de Galicia".
Mentres todo isto sucede, na fábrica de Sargadelos en Sada a actividade continúa de maneira ordinaria. O mesmo sucede nas tendas propiedade da compañía.
