O Sindicato Labrego Galego acusa a Leite Río de "promocionarse" nunha campaña publicitaria sufragada cos cartos dos gandeiros aos que, din, se lles volveu rebaixar o prezo do leite en orixe. O SLG acusa á empresa de Jesús Lence de pagar un céntimo menos en xaneiro respecto de febreiro.
A policía española detén catro presuntos activistas de Anonymous, un deles en Pontevedra. Están acusados de realizar ataques contra páxinas de partidos políticos, institucións e empresas, e de publicar datos persoais de membros da Policía Nacional destinados na Casa Real, dos GEO ou da líder de UPyD, Rosa Díez. O detido en Galicia sería un mozo de 16 anos, presuntamente integrante dun grupo internacional de hacking coñecido como sector 404. Foi posto baixo custodia de seus pais.
As vendas nos centros comerciais españois sufriron un retroceso de case o 3% durante 2011, vén de informar a Asociación Española de Centros Comerciales (Aecc). Fronte á caída de vendas houbo un incremento tanto do espazo total que ocupan os centros comerciais como do emprego. A caída de consumo déixase notar.
O indicador de clima económico en Portugal volveu marcar en xaneiro a cifra máis baixa de toda a serie histórica. "No mês de referência, observaram-se agravamentos dos indicadores de confiança da Construção e Obras Públicas e, em menor grau, da Indústria Transformadora, enquanto os indicadores do Comércio e dos Serviços aumentaram", vén de apuntar o Instituto Estatístico portugués.
Os votos do PP rexeitan as emendas de PSdeG e BNG e aproban a lei de recortes aos empregados públicos. Contra o remate da mañá, toda a información do debate e das protestas en Praza Pública.
Lage (PSdeG) amosa no pleno as promesas para os empregados públicos contidas no programa electoral co que Feijóo gañou as eleccións. "Todo incumprido", resume.
"Vostedes son os reaccionarios", dilles Rodríguez Miranda (PP) a PSdeG e BNG por rexeitar os recortes aos traballadores públicos
Rodríguez Miranda defende o proxecto de lei de recortes aos empregados públicos negando que existan "mordazas" para expresar o rexeitamento á norma e lembrando a Zapatero por "negar a crise".
Lage Tuñas (PSdeG) denuncia dende a tribuna do Parlamento que a Policía estea a gravar a protesta dos traballadores da Xunta mentres impide que o fagan os servizos de prensa dos sindicatos, como adiantou Praza Pública. "É unha volta atrás" e unha "coacción", censura.
Representantes sindicais, no momento de seren desaloxados da tribuna do Parlamento
