El Corte Inglés retirou a curtametraxe publicitaria, parte da súa campaña de San Valentín, que identificaba amor con control por parte da parella. O vídeo recibira numerosas críticas a través das redes sociais.
Fálase
O Play-Doc de Tui lanza unha iniciativa de crowdfunding para poder publicar a primera monografía dedicada a Charles Burnett, considerado un dos cineastas independentes máis importantes dos Estados Unidos, autor de títulos como Killer of Sheep, reflexo da sociedade norteamericana dos anos setenta e do racismo imperante.
Un pescador atopa un león mariño de "catro ou cinco meses de vida" na praia coruñesa de Bens. O animal, que se atopa "feble e delgado", vai ser avaliado na Coordinadora para o Estudo dos Mamíferos Mariños, en Nigrán. Segundo informa o Concello coruñés, chegou á costa "transportado por unha corrente desde as illas británicas ou Irlanda" e vaise avaliar se pode volver ao mar decontado ou ten que ser tratado previamente.
Unha ameaza de bomba nun voo con destino a Arabia Saudí pon en alerta o aeroporto de Barajas, en Madrid. A pasaxe foi evacuada e o aparello, revisado nunha zona illada do aeródromo.
O PP obtería un resultado moi semellante ao 20-D nunha repetición das xerais, segundo o CIS, que prognostica que Podemos e as confluencias superarían ao PSOE. O resultado de En Marea sería tamén practicamente o mesmo segundo esta sondaxe, realizada dúas semanas despois das eleccións e, polo tanto, antes de que Pedro Sánchez recibise a encarga de formar goberno. Os resultados íntegros, nesta ligazón.
Comeza a eliminación dos nomes franquistas que restaban no rueiro de Lugo. A primeira remuda foi a do golpista Teniente Coronel Teijeiro, cuxa rúa pasou a estar dedicada a Lois Peña Novo, en virtude do acordo plenario.
O Comité de Detencións Arbitrarias das Nacións Unidas ditamina que Julian Assange está retido polo Reino Unido de forma ilegal. O fundador de Wikileaks anunciara onte que se entregaría este venres ás autoridades británicas se a ONU decretaba que a detención se axustaba a dereito
Democracia Ourensana formalizará este xoves a petición dun pleno extraordinario no Concello de Ourense para debater a reprobación do alcalde, Jesús Vázquez. O PSdeG-PSOE non anunciou aínda se apoiará a reprobación, mentres que Ourense en Común rexeitará a moción, que interpreta como unha "manobra partidista" do grupo de Pérez Jácome.
O PP branqueou a caixa B de Génova igual que a de Valencia. Destacados cargos levaban o diñeiro negro ás sucursais máis achegadas á sede central para realizar doazóns ao partido. Os fondos eran previamente distribuídos polos responsables de finanzas populares.
O PSOE citouse en segredo co PP para que se absteña, segundo El Mundo. Os populares dixeron 'non' á oferta dos socialistas.