A Assembleia de Portugal tramita unha lei para supeditar os pisos turísticos á autorización das comunidades de veciños. A proposición foi rexistrada polo PS, que sustenta o Goberno portugués co apoio do Bloco de Esquerda e o Partido Comunista. Cóntao Público. Os aloxamentos turísticos están a ser obxecto de controversia en Galicia pola nova regulamentación da Xunta e o conflito con Competencia.
A vaga de calor afecta a toda Galicia e con especial intensidade a Ourense, con valores próximos aos 40 graos. A predición de Meteogalicia para este xoves augura unha nova xornada de altas temperaturas.
Feijóo insta a oposición a "pedir desculpas" polas "cousas que dixeron" de Baltar tras o arquivo da acusación por acoso sexual e suborno contra o presidente da Deputación de Ourense. "Repúxose o respecto ao presidente dunha institución democrática, non podo máis que alegrarme", sinala o presidente da Xunta.
ÚLTIMA HORA | Arquivada a causa contra o edil de Culturas da Coruña polo cartel do Entroido. A Fiscalía pediu o arquivo da denuncia iniciada pola presidenta da Asociación de Viúvas de Lugo e a xuíza aceptouno. Máis información, hoxe en Praza.
O presidente do Parlamento expulsa do pleno o vicevoceiro de En Marea, Antón Sánchez, por protestar ante a intervención dunha deputada do PP no debate dunha iniciativa do PSdeG sobre o pagamento das pensións a emigrantes galegos en Venezuela.
O PP rexeita no Parlamento a ILP que buscaba blindar por lei o carácter público do Hospital de Montecelo, en Pontevedra. A iniciativa, apoiada por 11 mil sinaturas, foi defendida por Anxo Rincón, portavoz da plataforma SOS Sanidade Pública, que denunciou as "carencias" que presenta a área sanitaria pontevedresa.
Extinguido un incendio forestal en Melón tras queimar 36 hectáreas. O lume iniciouse nas últimas horas do luns e permaneceu activo ata a tarde do martes. En Dozón, outro incendio queimou 30 hectáreas.
A Xunta cifra nun 40% a porcentaxe de alumnos e alumnas que non realizaron as probas de reválida de 6º de Primaria e de 4º de ESO celebradas este martes, un dato que os sindicatos elevan ata o 80%.
A reserva global de sementes no Ártico, asulagada por culpa do quencemento global. A instalación, situada no fondo dunha montaña na illa norueguesa de Spitsbergen, construíuse para superar calquera desastre natural, pero o rápido ascenso das temperaturas nos polos nos últimos anos pon en risco a súa integridade.
As xogadoras do Atlético de Madrid, gañadoras da Liga Feminina de Fútbol, recibirán unha prima de 54 euros polo título, fronte aos 300.000 euros por persoa que obterán os xogadores do Real Madrid, vencedores na Liga masculina. Cóntao Público.