As lonxas da Coruña e Vigo amencen baleiras por un paro en solidariedade co cerco galego. Non hai descarga nin poxa de peixe. Os mariñeiros participan hoxe nunha manifestación en Oviedo e reúnense coa Xunta para negociar un reparto máis xusto. Un grupo de armadores tamén acudirá ao Congreso. Imaxe de @copecoruna.
Guardiola, Lluís Llach ou Dyango reclaman nun vídeo o dereito a decidir de Cataluña e len o artigo primeiro do Pacto Internacional dos Dereitos Civís e Políticos en varios idiomas. A reivindicación forma parte da campaña #CatalansWantToVote.
A avogada do Estado acusa o xuíz do Alvia de facer unha "inquisición xeral sobre a actividade de Adif". Remítelle unha carta con duros reproches á súa investigación e acúsao de ter en conta "especulacións" da defensa do maquinista.
José Blanco marcha ao Parlamento Europeo. O ex ministro galego terá un posto de saída na candidatura que proporá o comité federal de listas do PSOE malia o desacordo de Ferraz. A presión do PSdeG foi clave na decisión.
Os expertos propoñen cobrar un imposto menor ás empresas pero quitar tamén as deducións. Os sabios seleccionados polo Goberno presentan a súa proposta de reforma fiscal en 125 medidas.
A Plataforma en Defensa da Sanidade Pública afirma que vixilará posibles acordos sobre o novo hospital de Vigo nas negociacións que está a manter o goberno local co Partido Popular. Representantes da Plataforma mantiveron unha xuntanza con Abel Caballero, na que o rexedor lles asegurou que "non se vai financiar con diñeiro público o beneficio dunha empresa privada"
Os rexistros da propiedade de Ourense e Monforte acolleron esta tarde novos actos de reivindicación do dereito das mulleres adecidir sobre o seu propio corpo como mostra de rexeitamento á contrarreforma do Goberno central. (foto: BNG Ourense)
233grados salienta o "ambiente de optimismo" que se está vivindo na prensa dixital nos Estados Unidos, cun incremento dos xornalistas contratados e do investimento externo. Pola contra, ALT1040 critica a "visión catastrofista" sobre as novas tecnoloxías ofrecida por Mariano Rajoy no acto de celebración do 110 aniversario de ABC.
Variety analiza as posibilidades dun "desembarco" inmediato de Netflix en distintos países de Europa. Considera pouco probable que isto se produza en 2014 en España, por mor da piratería e dos obstáculos impostos polas distribuidoreas, a pesar do "potencial crecente" do vídeo baixo demanda.
O blog Eu non manipulo, realizado polo Comité de Empresa da TVG, denuncia a cobertura realizada pola televisión pública dos disturbios protagonizados o pasado mércores en Compostela por axentes de policía e mariñeiros do cerco. Os traballadores da TVG cren que "volve demostrar unha absoluta falta de equilibrio informativo, reflectindo unha clara tendenciosidade".