Pachi Vázquez, ex-secretario xeral do PSdeG, anuncia a creación dun novo partido chamado Espazo Común para as eleccións municipais na provincia de Ourense. O actual líder dos socialistas, Gonzalo Caballero, resta importancia á operación, que ve como propia "do Entroido".
Alexandra Fernández anuncia que non repetirá como candidata ao Congreso. A ata agora deputada de En Marea sinala que, "tras unha profunda reflexión" se dispón a "poñer fin a unha etapa dura e intensa". "Tiven moi claro dende o primeiro momento que o meu tempo na política institucional había ser limitado" e "por iso sempre tiven presente a necesidade de retomar a miña carreira". "Volvo a ela, mantendo o meu compromiso militante dende a base", resume nun comunicado feito público nas súas redes sociais.
Falece o histórico dirixente do PNV Xabier Arzalluz aos 86 anos de idade. A formación nacionalista vasca despide con "máxima tristura" a "unha persoa, un jeltzale e un abertzale exemplar". Arzalluz presidiu o PNV ata 2004.
O Marisquiño confirma que se volverá celebrar en Vigo, outra volta no Paseo das Avenidas, tras confirmar o "apoio" de institucións e marcas privadas ao festival. A organización confirma ademais a celebración das principais probas deportivas do evento.
A Gala dos Mestre Mateo estará este ano máis viva ca nunca en Twitter. A Academia Galega do Audiovisual vén de desvelar que tuiteiras e tuiteiros acompañarán o vindeiro sábado nesta rede social a entrega dos galardóns do audiovisual galego, nos que A sombra da lei e Trote son os filmes con máis candidaturas.
O PP incluirá no seu programa para as xerais a promesa de que o persoal das Administracións públicas en Galicia, Euskadi ou Catalunya non teña que entender galego, euskera ou catalán, na liña do defendido por Ciudadanos nos últimos meses. Segundo a información que adianta El Mundo, os de Casado establecen unha suposta diferenza entre castelán e linguas "cooficiais", en referencia ao resto de idiomas, que non serían "requisito excluínte".
Condenados un garda civil e un ex-axente deste corpo por inxuriar as maxistradas Pilar de Lara e Estela San José en foros dunha web administrada pola Asociación Unificada de Gardas Civís. Segundo a sentenza do Xulgado do Penal número 1 de Lugo, un dos acusados terá que pagar unha multa de 5.400 euros e o outro, 2.400. Ademais, informa o TSXG, terán que pagar indemnizacións ás afectadas, das que ten que responder a devandita asociación.
Máis incendios no monte galego en pleno inverno. Medio Rural informou nas últimas horas de focos de lume na Mezquita (27 hectáreas), O Carballiño (23) ou A Gudiña (9). Alén dos datos que divulga a Xunta producíronse outros incendios en Forcarei, Padrenda ou Viana do Bolo, entre outros municipios. (Imaxe: @EmerxenciasOu)
O xuízo aos líderes soberanistas cataláns entra hoxe na fase de declaracións das testemuñas con ex-dirixentes como Mariano Rajoy, Soraya Sáenz de Santamaría e Cristóbal Montoro. Podes seguir todas as sesións do xuízo ao vivo en Praza.gal
O Goberno central confirma a apertura de novos xulgados do Social en Santiago e Vigo e outro de primeira instancia na Coruña, segundo anunciou o delegado, Javier Losada. Do plan queda fóra o xulgado do Social de Lugo, demandado dende hai tempo na cidade; diante desta negativa a alcaldesa lucense, Lara Méndez, anuncia a solicitude dunha xuntanza coa ministra Dolores Delgado para reiterar a reclamación.
