As Novas Xeracións do PP lanzan unha campaña para caricaturizar "as alianzas do nacionalismo" nas eleccións europeas. As mocidades do PP formulan argumentos como que o "discurso" de Bildu é "ambiguo coa violencia terrorista", que IU defende a República Española ou que PNV e CiU rexeitan o AVE a Galicia.
Beiras censura as detencións practicadas onte en todo o Estado por suposto "enaltecemento do terrorismo" con comentarios en Twitter. "O próximo será controlar as conversas de tasca", di o voceiro de AGE. Recólleo Faro de Vigo.
O líder agrarista francés e aspirante do Grupo Verdes/ALE á Comisión Europea, José Bové, acude este xoves a Galicia para apoiar a candidata do BNG ás eleccións do 25-M, Ana Miranda.
A presidenta da asociación Ve-la Luz foi detida esta mañá por un acto de "desobediencia civil" segundo informa a entidade. Xa foi posta en liberdade tras pasar a disposición xudicial. O colectivo contra a violencia de xénero denuncia unha "caza de bruxas" contra a súa representante.
A dirección de TVE defende o programa Entre Todos argumentando que axuda a integración das persoas con discapacidade. Fíxoo nunha resposta á deputada galega do PSOE Laura Seara que recolle Te interesa
Agustín Fernández Paz recibirá o Premio Trasalba 2014, outorgado pola Fundación Otero Pedrayo.
O número de persoas sen emprego no conxunto do Estado cae en 2.300 no primeiro trimestre, segundo as cifras da EPA que se veñen de facer públicos. Cae tamén o número de ocupados e ocupadas, unhas 184 mil persoas menos, o que eleva a taxa de desemprego en dúas décimas, até o 25,93%. En Galicia hai 16 mil parados e paradas máis, o maior incremento xunto con Baleares.
A asociación O Muíño da Lama denuncia a tala masiva de carballos centenarios protexidos en Xinzo de Limia. Sinalan que o propietario das árbores non tivo coñecemento das talas até que foi avisado por outros veciños.
A banca toma o control de Pescanova, ao tempo que Damm e Luxempart (que posúen o 12% da multinacional) abandonan o seu consello de administración. As entidades bancarias inxectarán 125 millóns de euros e buscarán captar outros 300 millóns entre os acreedores.
A Coruña inicia a súa tempada de eventos frikis, como destaca Marcus Fernández do seu blog. As xornadas MX2014, esta fin de semana, con torneos, karaokes, freeplay e xogos de mesa, precederá a Expotaku, do 23 ao 25 de maio, e a HobbyCon, en xullo.