Veciñanza de Guitiriz viaxa en tren ata Lugo para reivindicar que Fomento "non deixe morrer" as conexións ferroviarias na contorna. "O PP foi recortando trens, facendo precaria a conexión con Lugo e ata privándonos da parada do Alvia diurno a Madrid, que pasa polo Concello pero
non para", di a alcaldesa, Regina Polín.
O PP provincial da Coruña dá cargos ao ex-deputado que denunciou "irregularidades" na elección de Beatriz Mato como presidenta local do partido, Javier Escribano, e mais a militantes afíns a el. A incorporación prodúcese despois da retirada da demanda contra a devandita elección. Recólleo Europa Press na súa web.
En 2014 a daquela ministra de Fomento, Ana Pastor, prometeu que o rescate das autoestradas ía custar “cero euros”, lembra Maldita Hemeroteca. O Goberno asume agora perdas de 2.000 millóns.
Detidos dous policías nacionais na Operación Zamburiña que investiga a morte dun axente e a desaparición de varias armas na Comisaría de Ourense. Cóntao Europa Press na súa web.
A web ceosgalegos.com difunde a insólita imaxe dun raio azul do sol, un efecto óptico extraordinario gravado agora en Galicia por primeira vez.
O PP carga contra Ciudadanos por non lle ceder un deputado no Parlamento catalán que lle permita ter grupo propio. Os resultados dos populares nas eleccións de decembro -4 escanos tras o voto emigrante- déixaos no Grupo Mixto, no que tamén está a CUP, o que limita a súa capacidade de intervir e tamén de percibir subvencións públicas.
O Parlamento pide por unanimidade a fin dos privilexios fiscais que permiten á AP-9 non pagar o 95% do IBI aos concellos. A Cámara reiterou a petición coa aprobación dunha iniciativa de En Marea ao respecto.
O Goberno central rescatará en febreiro as autoestradas de peaxe asumindo unhas perdas de polo menos 2.000 millóns.
Feijóo asegura que no PPdeG hai persoas "que poden optar perfectamente" a substituílo na candidatura á Xunta e que a súa remuda será "máis fácil" que a de Fraga. O criterio que debera primar, agrega, é a "experiencia" na xestión pública e a decisión será tomada "no último ano da lexislatura", que remata en 2020.
O ministro do Interior defende no Senado as cargas policiais do 1-O en Catalunya como "lexítimas, profesionais e proporcionadas". eldiario.es está a contar a comparecencia de Zoido, na que recoñeceu que o despregamento policial para frear o referendo custou uns 87 millóns de euros.
