Fálase

Ourense en Común asegura que "nin os poderes locais nin as familias da vella política" os pararán, logo de recoñecer que se "trabucaron" ao "rebaixar as garantías" para aumentar a participación e ao "pensar que o mellor sistema eran unhas primarias abertas" nunha provincia "co prácticas caciquís da restauración borbónica". A plataforma cidadá explicou ante os medios o seu futuro e a forma de elixir a súa lista electoral. 

O Goberno central crea un documento especial para que as persoas inmigrantes sen papeis teñan acceso á atención sanitaria, dando marcha atrás á decisión que adoptara en 2012 e que acabara coa universalidade deste dereito en España. Esixirase estar empadroado/a e o dereito á atención estará limitado á comunidade autónoma de residencia.

Un incendio ameaza o Xurés. O lume, en Lobios, iniciouse ás 11 da mañá e supera xa as tres hectáreas. Fotografía de @BrifLaza. 

Santiago Fernández Rocha será o candidato de LugoNovo á alcaldía da cidade logo de vencer nas primarias da plataforma cidadá. Ourense en Común celebrará primarias entre os censados na urbe para elixir a orde de dez candidatos escollidos pola asemblea. 

O Goberno central rectifica e devolverá a atención primaria aos inmigrantres irregulares. Asegúrao o ministro de Sanidade, que lles nega, non obstante, o dereito á tarxeta sanitaria. En Galicia estas persoas teñen a atención limitada a casos de urxencia.

A UE pídelle á Xunta que reoriente o modelo económico de Galicia a un con "menos cemento" e "máis coñecemento", empregando os novos fondos Feder á penetración das TIC, á calidade no mercado laboral e a I+D.

Este mércores será o primeiro día sen cotas para a produción de leite, despois de 25 anos. As dez mil explotacións galegas temen un descenso de prezos e unha limitación do seu poder de negociación antre a industria. Piden unha moratoria ou, cando menos, máis control e inspeccións ante posibles abusos. 

O Concello de Vila de Cruces non autoriza a Festa no Mosteiro de Carboeiro, organizada dende hai semanas nas redes sociais como protesta polos 300.000 euros pagados pola Xunta á produtora de Enrique Iglesias. Estaba previsto que o evento se celebrase este venres na praia fluvial da Carixa. O Concello asegura que o espazo podería quedar moi deteriorado e ofrécese a buscar unha localización alternativa.

Dúas mulleres foron asasinadas polas súas parellas este luns en Alhaurín de la Torre (Málaga) e Lleida, mortes ás que se suma a dunha muller e os seus dous fillos pequenos en Gibraltar, posiblemente a mans do seu home.

CiU e ERC pactan con entidades soberanistas (ANC, Òmnium e AMI) proclamar a independencia 18 meses despois das eleccións do 27 de setembro se os dous partidos acadan a maioría absoluta. O acordo deixa fóra a ICV, Unió e CUP.