Besteiro reivindica que "o PSdeG cambiou Santiago, mentres que o PP só se dedicou a cambiar de alcaldes". O líder socialista presenta o candidato do partido na cidade, Paco Reyes, como unha persoa "que leva anos traballando" por Compostela, "porta a porta".
O BNG presenta a súa candidatura en Lugo como garantía de que "se resolvan os problemas da xente", di o seu candidato, Rubén Arroxo. O portavoz nacional do Bloque, Xavier Vence, destaca que o 40% da candidatura está formada por persoas non militantes da formación.
Educación recorta case un 20% a contía das bolsas para estudar idiomas no estranxeiro. Recólleo La Voz
O alcalde de Cualedro, que fixo vendas ilegais á Deputación de Ourense, mantense como rexedor. Cóntao El País Galicia
A Casa da Cultura de Monforte acollerá este sábado os actos do Ano Lois Pereiro, que incluirán unha lectura de textos a cargo de varios escritores e xornalistas, organizada pola AELG. O poeta pasará a darlles nome, ademais, á propia Casa da Cultura e á Biblioteca Pública Municipal. Ao longo de todo o ano os centros de ensino da vila acollerán varias actividades.
Anxo Lugilde recibe este mediodía en Lugo o premio xornalístico Puro Cora, que convoca El Progreso, pola súa traxectoria profesional como xornalista político. Lugilde é cronista do xornal lucense, correspondente de La Vanguardia e autor do volume De Beiras a Podemos, editado por Praza Pública.
Agadic convoca as axudas de 2015 para a promoción do talento audiovisual. Mantense a mesma contía de 2014 (145 mil euros) para a realización de longametraxes e curtas, así como para a escrita de guións, lonxe dos 400 mil de 2009 ou os 300 mil de 2010. O Observatorio do Audiovisual publicou en xaneiro un informe que analizaba a evolución destas axudas e pedía maior dotación e cambios para beneficiar os creadores individuais.
Feijóo di que "o financiamento do PP foi un gran erro" 24 horas máis tarde de que o PP vetase a súa comparecencia sobre o tema no Parlamento. Nunha entrevista en Onda Cero o presidente da Xunta evita desvelar se ten intención de recuncar como candidato en 2016.
Feijóo proclama que "a Compostela aberta de verdade" é a do PP. Na presentación de Agustín Hernández como candidato o presidente da Xunta di que no partido están "orgullosos do que fixemos" na capital galega, onde "asumimos os erros que cometemos", afirma.
O PSdeG insta a Feijóo a "pedir perdón" por autorizar as piscifactorías de Touriñán e Rinlo, ilegais segundo o Supremo, que obrigaron o Goberno a compensar as empresas con indemnizacións millonarias.
