Os alcaldes de Santiago, Lalín e Silleda acordan demandar conxuntamente a rebaixa da peaxe da AP-53, que acada os 5,95 euros. Martiño Noriega, Rafael Cuíña e Manuel Cuíña trasladarán a petición aos plenos como moción, que despois será remitida ao Ministerio de Fomento, e piden implicación da Xunta. A autoestrada é actualmente propiedade dun fondo do goberno de Malaisia.
Junts pel Si ofrece á CUP un Consello da Presidencia colexiado, no que Junqueras, Romeva e Munté tamén terían trato de presidentes xunto a Artur Mas. É a última oferta para evitar unhas novas eleccións.
Aznar insta a Rajoy a actuar contra o xihadismo e pide que non quede "cos brazos cruzados" ante "a ameaza". Rajoy insiste en esperar a que Francia pida axuda e decidir xunto a oposición.
Unha de cada catro vivendas construídas desde 2008 en Galicia continúa sen vender. Son case 30.000 os pisos novo que aínda non atoparon comprador.
Galicia perdeu 8.000 empresas durante a crise. Entre 2009 e 2013, o número de compañías que operaban en Galicia caeu case un 4%, aínda que nunha porcentaxe menor que a do conxunto do Estado.
No seu segundo aniversario, GCiencia entrevista a Ángel Carracedo, catedrático pola USC e un dos maiores expertos mundiais en xenómica. Carracedo reclama que "a educación necesita unha revolución absoluta" e asegura que non deixaría Galicia "nin por todos os cartos do mundo", aínda que recibe ofertas millonarias
Físicos da USC recrean no Gran Colisionador de Hadróns os momentos inmediatos ao Big Bang. O investigador Carlos Salgado lidera o proxecto HotLHC, que mide as propiedades da primeira materia do Universo
Esta tarde celébrase en Compostela o evento LGx15, que inicia un novo proxecto da CTNL de "difusión de ideas para o futuro da lingua". Entre as persoas que intervirán no acto, na Sala Capitol, está o científico Xurxo Mariño, o actor Luís Iglesia ou a poeta María Lado, entre outras.
Vence e Lobeira, citados a declarar ante a Audiencia Nacional en plena campaña, segundo conta Sermos Galiza. Declararán como testemuñas ante o xuíz Eloy Velasco o vindeiro 14 de decembro no curso dunha investigación anti-terrorista.