Pontón apela en Uruguai a "recuperar unha esquerda que teña claridade ideolóxica" ante o "rearme brutal da dereita e a extrema-dereita". Afirmouno no marco da xornada Esquerdas: soberanía e globalización, na que a portavoz nacional do BNG participou xunto ao ex-presidente uruguaio José Mujica. O vídeo íntegro da sesión pódese ver nesta ligazón.
Persoal de Alcoa e cidadanía concéntranse ante a Delegación do Goberno na Coruña contra o peche da planta que a multinacional ten na cidade. Os traballadores cortaron o tráfico e clamaron contra as intencións da multinacional. A firma rexeita a arbitraxe reclamada polo comité que incluía a mediación do Consello Galego de Relacións Laborais. Foto:@BNGACorunha
Dimite unha concelleira do PP de Viveiro "decepcionada tanto coa xestión do PP provincial de Lugo, como coa da Xunta" tras os asolagamentos na vila. María Jesús Vale -na imaxe, ante a conselleira de Infraestruturas na zona afectada polas inundacións- foi a número 4 da lista do PP viveirense nas municipais de 2015, cando os populares obtiveron 5 edís. Cóntao El Progreso
Comeza a terceira semana de folga do persoal das Urxencias do Clínico de Santiago. A escaseza de persoal e a reclamación de máis medios para atender os doentes son as principais reivindicacións da protesta, na que a Xunta decretou servizos mínimos do 100%.
Falece o director de cine italiano Bernardo Bertolucci. O gañador do Óscar está considerado o último "gran mestre" do cinema transalpino.
Nada que celebrar. A ollada do alumnado de 2º da ESO do IES Politécnico de Vigo sobre a loita contra a violencia machista neste 25 de novembro.
A UE aproba o Brexit. Os socios comunitarios dan o seu visto e prace ao acordo de desconexión e á declaración política sobre a saída do Reino Unido e a relación futura con el.
O Concello de Guitiriz celebrou este sábado o nomeamento de Alfonso Blanco Torrado como fillo adoptivo do municipio. O crego é o impulsor da Asociación Xermolos, da Irmandade Manuel María, do Festival de Pardiñas e de numerosas actividades culturais e sociais na Terra Chá. O evento inzou de veciñanza e amizades a igrexa nova de Guitiriz, tal e como amosa este vídeo divulgado por Xermolos. Na imaxe, Alfonso Blanco nun Festival de Pardiñas.
Continúan os paros de persoal da CRTVG no marco da folga que están a desenvolver. O primeiro desta mañá tivo "un 70% de seguimento computando todos os centros de traballo", afirma o comité de folga, que agrega que "o plantel de fin de semana é tan raquítico que resulta ben doado de contar".
Sánchez anuncia que España ergue o veto ao acordo do Brexit que a UE prevé ratificar mañá tras obter garantías dabondo sobre Xibraltar
