O BNG amordázase no Parlamento para protestar pola imposibilidade de preguntarlle a Feijóo na sesión de control. É a primeira vez que non pode realizar esta pregunta dende que foron creadas as sesións de control, no ano 2002. A limitación débese ao novo reparto de iniciativas parlamentarias.
A Marea Atlántica vén de presentar a súa ferramenta para un programa colaborativo, na que os veciños poderán facer as súas propostas ata o vindeiro 3 de abril de cara á elaboración definitiva do programa electoral.
A fiscalía do TSXG solicita a "conclusión e arquivo do sumario" da investigación sobre Paula Prado no marco da Operación Pokémon e o xuíz instrutor atende a petición "ao non apreciar a comisión de delito", segundo informa o PP. A investigación xiraba en torno á posible comisión de delitos de tráfico de influencias e fraude na súa etapa como concelleira en Santiago. Prado di que a causa foi "inxustamente iniciada".
Gonzalo Trenor (PP) asegura no Parlamento que "ninguén foi encausado por impedir un desafiuzamento". Afirmou durante o debate dunha iniciativa de AGE sobre o desaloxo dunha familia na parroquia compostelá de Aríns. No mesmo debate o deputado de Alternativa Antón Sánchez foi apercibido por afirmar que os populares levan "trinta anos financiándose con diñeiro negro" e a expresión foi retirada.
A Fundación Civio publica o libro Españopoly. Cómo hacerse con el poder en España (o, al menos, intentarlo), de Eva Belmonte, que analiza "cales son as regras do xogo, quen son os principais xogadores e a que intereses responden".
Sin Permiso publica unha entrevista co profesor David Harvey, que destaca que "Hai enerxías para derrotar a oligarquía global. O problema é a incapacidade da esquerda para canalizalas".
David Cal retírase e xa non competirá nos Xogos de Río en 2016. Deixa os seus adestramentos no Brasil por falta de motivación, segundo adianta Marca. O de Cangas é o mellor deportista galego e español nuns Xogos Olímpicos.
A acusación popular reclama a imputación de Acebes e De Cospedal no caso da 'caixa B' do PP. En El Diario
A Consellería de Educación ratifica que 4º da ESO terá un itinerario orientado ao mundo laboral e outro, ao académico, desenvolvendo así a Lei Wert. Recólleo Faro de Vigo
Os dous incendios de Ponteareas arrasaron xa máis de 350 hectáreas, segundo os últimos datos de Medio Rural, que os dá por controlados dende as doce e media da noite