Este martes preséntase en Compostela (Pazo de San Roque, 19 horas) o libro Ramón Lugrís. Sempre en Galicia, sempre en Europa, editado polo IGADI, que serve como homenaxe ao galeguista, finado en decembro, que fixo bandeira do seu europeísmo.
Fálase
O paro rexistrado sobe en 7.639 persoas en Galicia, a terceira comunidade onde máis medra en xaneiro. O número de afiliados á Seguridade Social descende en máis de 15.000 persoas. Máis información, esta mañá en Praza.
A Xunta inicia este ano os concursos para facer funcionarios a 6.000 empregados. Prevé que a final de lexislatura se beneficien os primeiros traballadores.
Espectacular incendio na zona vella de Pontevedra. As lapas comezaron nunha tenda da praza da Ferrería e estendéronse a un edificio. Non houbo feridos tras desaloxárense varias persoas.
O PP aposta por repetir eleccións como única saída para Rajoy. O aínda presidente en funcións non intentará ser investido aínda que Pedro Sánchez fracase.
Pablo Iglesias convida a Pedro Sánchez a escoller entre Podemos e Ciudadanos e afirma que a formación que lidera e a de Rivera son "incompatibles" nun Goberno. "Estou convencido de que tanto as bases coma os votantes do PSOE prefiren que se entendan con nós que con Ciudadanos", engadiu.
O PSOE suspende as negociacións co goberno da Coruña para o orzamento. Xulio Ferreiro critica a actitude dos socialistas, aos que acusa de ter presentado "cero propostas".
Ciudadanos pide abordar xa a negociación dunha gran coalición con PP e PSOE para unha "segunda transición", en verbas de Albert Rivera.
VÍDEO Os Poetarras escríbenlle unha canción de amor a ENCE con acordes d'O Padriño tras a prórroga da concesión. É o seu Love theme from ENCE
As gravacións do Comité Federal evidencian a tensión no PSOE. A Cadena SER publica os audios das intervencións dos baróns críticos con Pedro Sánchez e mesmo hai quen dá por feitas as eleccións.
