O alcalde de Palas de Rei e o seu antecesor, condenados por prevaricación e acoso laboral á secretaria municipal xunto a outros 4 edís do PP. O rexedor Pablo Taboada e o anterior titular do posto, o actual tenente de alcalde Fernando Pensado, son condenados pola Audiencia de Lugo a 15 meses de prisión e 9 e 8 anos de inhabilitación, respectivamente. Toda a información, nesta ligazón.
A Xunta organiza unha nova presentación do proxecto de servizos para o vello hospital de Lugo. Como anunciara o pasado xuño, o complexo volverá ter usos sanitarios, entre outros, cando estea a piques de cumprir unha década pechado.
O taxi da fin do mundo. O xornal Swiss info conta a historia dos taxistas galegos que transportan emigrantes ata Suíza e a súa situación actual, agora a competiren contra as liñas aéreas de baixo custo.
DOCUMENTAL ÍNTEGRO | A produtora Mediapro publica integramente Las cloacas de Interior, o documental sobre as malas prácticas no Ministerio do Interior dende a Transición e centrado na 'policía patriótica' que presuntamente actuou baixo o mando do Goberno de Mariano Rajoy contra adversarios políticos do PP, especiamente contra o soberanismo catalán. Foi emitido por ETB e TV3 esta semana. O documental, íntegro neste espazo.
O PP rexeita un pleno extraordinario para abordar o veto do Goberno de España ao traspaso da AP-9 porque xa hai "unanimidade" ao respecto. Recólleo Faro de Vigo
Controlados os incendios de Ribas de Sil e mais do Barco de Valdeorras, nos que arderon 126 e 64 hectáreas de monte, respectivamente. Son os únicos incendios dos que informou a Xunta nos últimos dous días.
En Marea anuncia que celebrará o Día Nacional de Galicia "dun xeito lúdico" cunha festa no parque compostelán de Vista Alegre baixo o lema A Galicia que a xente queremos. A patria das comúns. A xornada, avanzan, contará con intervencións de "representantes de movementos sociais" para que "as persoas teñan todo o protagonismo". A intervencións políticas, sinalan, combinaranse con diversas actividades lúdicas.
Activo un novo incendio na provincia de Ourense que "supera as 20 hectáreas" afectadas no Barco de Valdeorras. É o segundo incendio do que Medio Rural informa nas últimas 24 horas, aínda que se produciron varios máis. (Imaxe: Brif Laza)
Máis dun cento de familias benefícianse da renda social municipal da Coruña. Ao mes incorpóranse de media 25 novas rendas sociais, cunha contía que sobrepasa os 456 euros
O PPdeG anuncia que vai "celebrar o Día de Galicia" catro días antes do 25 de xullo cunha homenaxe a Fraga en Vilalba encabezada o vindeiro venres polo secretario xeral, Miguel Tellado, e á que non acudirá Feijóo por motivos de "axenda". No anuncio dos actos Tellado chamou a contrastar este evento coas xornadas organizadas "por Beiras e Anova, que traerán aos seus amigos da CUP e Bildu para copiar o secesionismo vasco e catalán".
