Milleiros de persoas reclaman que o galego se poida empregar "en todo e para todo"

Mobilización de Queremos Galego na Praza do Obradoiro CC-BY-NC-SA Queremos Galego

Hemeroteca

Milleiros de persoas, arredor de 2.000, concentráronse este luns na Praza do Obradoiro de Compostela para reclamar, unha vez máis, o "dereito a vivir en galego" no país e demandar unha mudanza na política lingüística da Xunta para deter a perda de falantes. 

Arredor de 2.000 persoas reclamaron o "dereito a vivir en galego" e demandaron un cambio na política lingüística da Xunta

Logo de non se celebrar o ano pasado pola COVID este xa tradicional acto reivindicativo, a plataforma Queremos Galego recuperou a mobilización na que se reclamou "que se recoñeza plenamente o mesmo dereito que ten calquera outro cidadán en calquera outro lugar do mundo nunha lingua oficial".

Marcos Maceira le o manifesto de Queremos Galego na Praza do Obradoiro CC-BY-NC-SA Queremos Galego

Foi o que pediu o presidente da Mesa pola Normalización Lingüística e voceiro da plataforma, Marcos Maceira, que lamentou que logo de 40 anos de autonomía, o galego sexa "aínda hoxe unha lingua só aparentemente oficial, pero que non se pode empregar en todo e para todo".

"O galego é aínda hoxe unha lingua só aparentemente oficial, pero que non se pode empregar en todo e para todo", di Marcos Maceira

"Non é unha lingua plenamente oficial aquela que está excluída da xestión sanitaria en plena pandemia, excluída de practicamente todos os contidos audiovisuais, e cun emprego arbitrario, en función do que diga o funcionariado, na Administración pública", lembrou nun acto no que as persoas inscritias para participaren distribuíronse por toda a praza respectando as distancias de seguridade.

Entre os asistentes, os líderes de BNG e PSdeG, así como outros membros dos partidos e representantes municipais e sindicais. Así, a portavoz nacional do Bloque, Ana Pontón, reclamou "un cambio de rumbo nas políticas lingüicidas" postas en marcha polo PP desde o Goberno galego e "abrir unha nova etapa para o galego e desconfinalo" porque "o futuro do galego é tamén o futuro dunha Galicia máis forte".

Pontón lembrou que o galego "é a única lingua que perde falantes no Estado" e sinalou un informe da Real Academia Galega (RAG) que "certifica que o decreto da vergoña impide a miles de novos ter competencia lingüistica en galego". 

Pola súa banda, o secretario xeral do PSdeG, Gonzalo Caballero, dixo que o galego é "unha lingua viva que necesita apoio e discriminación positiva desde as políticas da Xunta", así como para o propio sector cultural que precisa "apoio e estímulo" para recuperar os niveis de antes da crise.

Isabel Risco diríxese aos manifestantes na concentración de Queremos Galego CC-BY-NC-SA Queremos Galego

Caballero destacou o "retroceso" no uso do galego por parte da mocidade do que advirten as institucións europeas e considerou que para o futuro deste idioma é "fundamental que nenos e nenas sentan amor pola lingua" polo que insistiu nunha discriminación positiva para que poidan "ver tele, cine, ler, ter videoxogos en galego e pór en valor esta lingua".

A concentración terminou coa lectura dun manifesto por parte de Marcos Maceira, quen asegurou que era necesario "volver á rúa" con esta convocatoria para clamar por ter un "dereito real e exercible a vivir en galego" e citou a Xela Arias, a autora homenaxeada este ano.

"Quere iso dicir que un pobo que se alonxa do seu idioma alónxase da súa cultura. Quere iso dicir que a un pobo ao que alonxan do seu idioma alónxano dá súa cultura", advertiu usando as palabras da poeta, antes de reclamar que o galego poida ser unha lingua dispoñible "en todo e para todo". 

Despece

  • A RAG gaba a «rebeldía» e «enerxía» de Xela Arias e reivindica a importancia da transmisión interxeracional do galego

    Plenario da RAG en Vigo polo Día das Letras Galegas CC-BY-SA RAG

    A Real Academia Galega (RAG) celebrou este luns unha sesión plenaria extraordinaria co gallego do Día das Letras Galegas dedicado a Xela Arias, poeta da que se destacou a pertenza a unha xeración "enerxética e ilusionante" e a importancia que a súa familia --e todas as familias-- teñen na transmisión interxeracional do galego.

    "Cando as familias manteñen viva a riqueza do idioma e saben transmitilo con dignidade, amor e coherencia aos descendentes, a lingua medra, axigántase"

    Así, o presidente da RAG, Víctor Freixantes, sinalou o exemplo da familia de Xela Arias, cun especial recoñecemento a seus pais, porque "cando as familias manteñen viva a riqueza do idioma e saben transmitilo con dignidade, amor e coherencia aos descendentes, a lingua medra, axigántase, convértese nunha onda contaxiosa de afectos, factor de socialización fundamental para construír a nación do futuro, que non acaba en nós, senón que continúa sempre nos que veñen despois".

    Plenario da RAG en Vigo polo Día das Letras Galegas CC-BY-SA RAG

    "Esta responsabilidade témola todos. Non podemos mirar cara a outro lado", dixo Freixanes sobre esa transmisión interxeracional do idioma tras destacar a Xela Arias como pertencente a unha xeración con raiceiras no rural, que medrou nos barrios das cidades galegas en expansión e que viviu a mocidade nun momento "especialmente activo e ilusionante", o dos anos 80 e dos 90, no que "Vigo tivo un protagonismo moi especial". 

    "Foi o espazo creativo, emocional, familiar e profesional onde Xela Arias desenvolveu a maior parte da súa vida", destacou sobre Vigo o presidente da Academia, que reivindicou a xornada do 17 de maio como "moito máis que unha xornada festiva" porque é unha ocasión para reivindicar a activación do uso da lingua galega “non só na vida litúrxica, senón na vida”. Por iso, insistiu, é moi importante o traballo que se realice "coas novas xeracións". 

    O acto arrincou cunha actuación musical de Fernando Abreu, Mónica de Nut e Pablo Carreira, a partir dun dos textos da homenaxeada. Logo diso, a secretaria da RAG, Margarita Ledo, leu o acordo do plenario no que se determinou que o Día das Letras Galegas de 2021 se dedicaría a Xela Arias Castaño.

    Ademais, todas as intervencións gabaron a "rebeldía" da poesía da homenaxeada e destacaron o papel que Xela Arias xogou como editoar e tradutora na normalización do galego. A voz da poeta recitando Intempériome abriu a celebración para que logo despois Ana Romaní destacase que a homenaxeada "materializa, na súa voz, a independencia e a liberdade como actos fundamentais da condición poética e da existencia". 

    Ademais, Marilar Aleixandre explorou a identificación da poesía de Xela Arias cos animais e a súa relación coa ollada feminista como "poderosa metáfora de emancipación", mentres que Manuel Rivas destacou a obra Intempériome porque "axiña se verá como un chanzo imprescindíbel nesa historia literaria alternativa que ela vía como unha escaleira de abrazos". 

    "A transición entre a Galicia rural e urbana"

    Por outra banda, no acto institucional do Goberno galego co gallo do 17 de maio, o presidente da Xunta, Alberto Núñez Feijóo, destacou que Xela Arias representa "a transición entre a Galicia rural e urbana" e que "personifica a modernidade" por ter abordado "terreos pouco explorados" no seu momento como a maternidade, a crítica social ou o feminismo. 

    Feijóo destacou no acto celebrado en Vigo a "contribución" importante que tres mulleres fixeron a que Galicia sexa como é hoxe en día: Rosalía de Castro, que motiva a festa do Día das Letras; Emilia Pardo Bazán, por proxectar o galego "no mundo enteiro"; e a propia Xela Arias, "poete, tradutora, editora, mestra e nai". 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza