Decenas de embarcacións de ráfting, caiacs e piraguas realizaron este domingo un descenso reivindicativo en contra do proxecto de Altri. Foi polo último tramo do río Ulla, desde a Ponte de Sinde até o Campo dá Insua, en Padrón, xa moi preto da súa milledesembocadura na ría de Arousa.
Ao final do percorrido, centos de persoas agardaron polas embarcacións e leron un manifesto esixindo que se "descarte definitivamente o proxecto de macrocelulosa" da empresa portuguesa na Ulloa, así como a reactivación da mina de Touro.
"Os dous proxectos industriais desenvolveríanse, moi preto o un do outro, na conca do río Ulla, afectando aos ecosistemas e a calidade das augas e poñendo en perigo a ría de Arousa", reivindicaron nunha mobilización convocada pola Plataforma Ulloa Viva, a da Defensa da Ría da Arousa, a de Mina Touro-O Pino Non, ademais doutros colectivos e entidades ecoloxistas como Greenpeace ou Adega.
A acción pide que se "descarten definitivamente" os proxectos pola súa afectación aos ecosistemas e as augas
O descenso reivindicativo discorreu na súa totalidade polo sistema fluvial Ulla-Deza, unha Zona de Especial Conservación da Rede Natura 2000 cuxos valores naturais "perigan polos dous proxectos industriais que a Xunta de Galicia declarou de interese estratéxico, diante dunha oposición social histórica".
O espazo natural, lembran os convocantes, de máis de 1.600 hectáreas, inclúe unha valiosa rede hidrográfica que serve de fronteira entre as provincias da Coruña e Pontevedra, acubillando decenas de hábitats de interese comunitario, algúns deles prioritarios, e numerosas especies protexidas, como a lamprea, o salmón atlántico, a toupa de ría, a londra ou a endémica saramaganta.
"Calcúlase que máis de 200.000 habitantes de numerosos concellos dependen da calidade hídrica do río Ulla para a subministración das redes municipais de auga", explican.
A instalación da fábrica de celulosa que Altri pretende emprender na comarca da Ulloa atravesa actualmente "uns dos seus momentos críticos, á espera dunha posíbel Autorización Ambiental Integrada (AAI) por parte da Xunta de Galicia, diante da cal moitas organizacións a anunciaron recursos xudiciais".
Ademais, as organizacións convocantes desta protesta animan a cidadanía galega a "participar masivamente", o vindeiro 1 de xuño ás 12 do mediodía, na xa tradicional marcha contra as celulosas en Pontevedra, que discorrerá baixo o lema “Nin Ence na ría, nin Altri na Ulloa”.
Entre os asistentes, o concelleiro de Medioambiente de Santiago, Xesus Domínguez, que denunciou que "con mentiras e ocultando información, pretenden levar adiante esta macrocelulosa que vai contaminar un espazo natural e dunha gran riqueza, como é o río Ulla e que vai chegar tamén á ría de Arousa, contaminando o modo de vida de milleiros de persoas".
En concreto, a actividade deste domingo en Padrón estivo organizada pola Plataforma Ulloa Viva, a Plataforma en Defensa da Ría de Arousa (PDRA), a Plataforma Mina Touro-O Pino Non, Adega, Greenpeace, Ecoloxistas en Acción, Sociedade Galega de Historia Natural, Baixo Ulla Vivo e Caiac Extremo Galiza, coa colaboración dos concellos de Padrón e Pontecesures.
