O tribunal rexeita un recurso da CIG co argumento de que malia ser impulsada e liderada polo Goberno galego a empresa non superaba o 50% de participación pública
O Tribunal Superior de Xustiza de Galicia (TSXG) fixo pública este mércores unha sentenza que desestima unha petición da CIG para que Impulsa Galicia, empresa creada e liderada pola Xunta, fixese público o pacto que asinou en outubro de 2021 con Altri para a súa instalación en Galicia. O tribunal xustifica que a lexislación galega só considera pública unha empresa, e polo tanto sometida á normativa de transparencia, se a participación pública ou os dereitos de voto públicos superan o 50%, o que ao seu ver non sucede neste caso.
A sentenza do TSXG admite que "o caso presentaba serias dúbidas de dereito" e que "aínda que a Xunta de Galicia non acada o control que esixe [a lei galega], a súa posición en Impulsa Galicia atópase moi próxima a el" o que "facía razoable" que a CIG pedise un pronunciamento do tribunal. Unha CIG que, pola súa banda, pedira o documento a Impulsa Galicia, non á Xunta.
A sentenza avala o argumento que vén esgrimindo o Goberno galego para manter oculto o pacto e o propio funcionamento de Impulsa Galicia, empresa xa disolta hai un ano, ante peticións reiteradas de maior transparencia por parte do Consello de Contas ou de BNG e PSdeG no Parlamento. Praza.gal tamén vén formulando desde hai anos varias solicitudes de acceso ao documento á propia Xunta a través da Lei de Transparencia, a última tras asegurar o presidente Rueda en marzo que el coñeceu o acordo a través de "representantes da Xunta". Unha petición de transparencia tamén denegada co argumento de que Rueda non o coñeceu "no exercicio das súas competencias", pero sen que se aclarase en calidade de que o coñeceu.