"O pobo palestino está a sufrir un xenocidio levado a cabo por Netanyahu, pero tamén pola administración norteamericana. Porque o que dirixe esas accións hoxe en día é Estados Unidos"

Fayez Badawi naceu nun campo de refuxiados no Líbano, tras a expulsión da súa familia de Palestina durante a Nakba de 1948. Aos doce anos comezou a militar politicamente na esquerda revolucionaria palestina e chegou a ser portavoz en Europa da Fronte Popular para a Liberación de Palestina (FPLP), unha organización marxista-leninista e laica que forma parte da Organización para a Liberación de Palestina (OLP). Actualmente, continúa denunciando a ocupación israelí e defendendo o dereito do pobo palestino á resistencia.

Badawi participou a pasada semana en Vigo nas xornadas Mundo en crise, organizadas por ECOAR))) no marco do proxecto Ágora R, nas que tamén participaron Xosé Manuel Beiras, Miguel Urbán, Eduardo Giordano, Alberto Quian, Manu Levin, Aurora Moreno ou Queralt Castillo. Durante catro días analizáronse as tensións xeopolíticas actuais e as loitas sociais, cunha perspectiva crítica sobre a acumulación de poder das grandes potencias e das empresas transnacionais.

Este sábado 29 están convocadas ás 12 horas concentracións en Vigo (MARCO), A Coruña (Obelisco), Ourense (Subdelegación do Goberno), Santiago (Praza Roxa), Pontevedra (Praza da Peregrina) e Ferrol (Praza de Armas) para esixir un alto o fogo definitivo. As mobilizacións, convocadas polo movemento Pararlaguerra.es, terán lugar ao mesmo tempo en 85 cidades e vilas de todo o Estado.

Fayez Badawi naceu nun campo de refuxiados no Líbano. Foi portavoz en Europa da Fronte Popular para a Liberación de Palestina (FPLP), unha organización marxista-leninista e laica que forma parte da OLP

O luns 31 haberá concentracións ás 20 horas en 34 cidades e vilas galegas nunha Xornada Nacional de mobilizacións organizada pola Coordinadora Galega de Solidariedade coa Palestina. A xornada coincide coa conmemoración do Día da Terra palestina, que se celebra cada 30 de marzo e que conmemora a histórica folga xeral de 1976 contra o roubo de territorios palestinos.

Falamos con Fayez Badawi sobre a situación que se segue a vivir en Palestina, as case 50 mil persoas asasinadas por Israel no último ano e medio de ataques, agravada pola ruptura unilateral do alto o fogo decidida por Tel-Aviv o pasado 18 de marzo.

"Biden falaba de dereitos humanos, pero ao mesmo tempo estaba asasinando. Trump fala, di 'voute atacar' e ataca, asasínate. Pero na práctica non hai diferenza"

A ruptura do alto o fogo é unha mostra de que non se pode confiar na palabra de Netanyahu e, probablemente, de Israel?

O pobo palestino está a sufrir un xenocidio total levado a cabo por Netanyahu, pero tamén pola administración norteamericana. Porque o que dirixe esas accións hoxe en día é Estados Unidos, non soamente Trump, porque en tempos de Biden levou a cabo a mesma política. 

A segunda fase do alto o fogo non a van a aplicar, porque a eles o que lles interesa é someter o pobo palestino. Durante 16 meses destruíron o 86% da franxa de Gaza,  asasinaron e feriron a máis de 200.000 persoas nesta franxa que ten 366 quilómetros cadrados. Que buscan? Aniquilar a todos os palestinos. A Israel o que lle interesa é tentar facer limpeza étnica e ter todo o territorio palestino. Esa é a realidade.

Ante isto que pode facer o Tribunal Internacional? Nada, porque o que manda é o poder capitalista, o poder das armas, un poder das armas en mans dos Estados Unidos da OTAN.

"Se realmente a UE e España queren defender os dereitos humanos, por que non rompen relacións con Israel?"

Que diferenzas hai entre Biden e Trump? En que cambia a posición estadounidense? Que cambiou para Palestina e para Israel co regreso do republicano ao poder?

Que diferenza hai entre unha administración e a outra? Ningunha. Biden falaba de dereitos humanos, pero ao mesmo tempo estaba asasinando. Na última semana antes de abandonar a Casa Branca, Biden regalou ao chamado Estado de Israel 8.700 millóns de dólares en armas.

En cambio, Trump fala, di 'voute atacar' e ataca, asasínate. Pero na práctica non hai diferenza. Vímolo nos últimos anos: as dúas administracións actúan en apoio total ao Estado de Israel.

Antes, quen dirixía as negociacións era Antony Blinken, responsable da política exterior dos Estados Unidos, pero con dobre nacionalidade, israelí e estadounidense. E agora quen está a levar as negociacións para a segunda fase é Steve Witkoff, tamén de familia xudía.

"A Unión Europea tomou medidas para bloquear a Rusia, romper relacións co país e mesmo expulsar a Rusia dos eventos deportivos. Por que non fan isto con Israel? Por que deixan participar os equipos de Israel?"

Como valoras a posición que nestes dous últimos anos está a manter o Estado español, que si levou a cabo algunha iniciativa simbólica, como recoñecer o Estado de Palestina, e a Unión Europea?

Se realmente a UE e España queren defender os dereitos humanos, por que non rompen relacións con Israel? Hai unha cláusula, denominada cláusula democrática da Unión Europea, que indica que cando un Estado non respecta o dereito internacional, hai que sancionalo. O que fai a Unión Europea, e tamén España, é consentir o Estado de Israel. É certo que España levou a cabo uns pasos para limpar a cara, pero queremos accións reais. 

Por exemplo, vimos durante eses últimos tempos o que pasou en Ucraína e o que pasa con Rusia. A Unión Europea tomou medidas para bloquear a Rusia, romper relacións co país e mesmo expulsar a Rusia dos eventos deportivos. Por que non fan isto con Israel? Por que deixan participar os equipos de Israel?

Despois, hai que denunciar que Alemaña ten leis agresivas contra o pobo palestino. Se alguén pide a nacionalidade alemá, ten que recoñecer o Estado de Israel. É unha barbaridade. Ademais, estase a perseguir a xornalistas, activistas e a estudantes críticos coa política de Israel, acusándoos de antisemitas. Pero como que antisemitas? Os semitas son os palestinos.

Nós desconfiamos totalmente da Unión Europea, porque está enfrontada contra todos os pobos do mundo. Nos últimos anos vimos as guerras nas que participaron algúns países de Europa, como en Iraq, en Iemen ou en Libia.

"En toda a miña vida non vin máis que barbarie. Pero claro que son optimista. Son optimista porque hai unha resistencia, porque temos un pobo que está a loitar"

Como mantén a esperanza o pobo palestino? Como é quen resistir, de caer e de volver a levantarse xeración tras xeración? Ti mesmo tes esperanza? Es optimista de cara ao futuro de Palestina?

O outro día un medio de comunicación occidental preguntáballe a unha muller palestina de 82 anos: "vostede está coa resistencia?" A avoa respondeu: "como que se estou coa resistencia? Se a resistencia son eu, é o meu fillo, é a miña filla, son os meus netos. Non son mercenarios que veñen de fóra, son os nosos fillos que defenden a terra"

Optimista? En toda a miña vida non vin máis que barbarie. A miña familia era do norte de Palestina e marchou refuxiados ao Líbano. Nacín nunha chabola de folla de lata, non había nin luz, nin auga, nin había apenas comida. Sufrimos moitas matanzas. Coas miñas propias mans enterrei xente, unhas 26 persoas na matanza de Sabra e Shatila. Esa é a vida en Palestina: detencións, cárceres, mortes. Que culpa teñen os milleiros de nenas e nenos que foron asasinados en Gaza? 

Pero claro que son optimista. Son optimista porque hai unha resistencia, porque temos un pobo que está a loitar. Todos os pobos baixo a ocupación teñen dereito e a obriga á resistencia. No caso de Palestina, a resolución de Nacións Unidas 3070, do ano 1973, di que o pobo palestino ten dereito á resistencia. Durante a historia vimos que todos os pobos que estaban baixo o xugo do colonialismo venceron. Pasou en Vietnam, pasou en Alxeria e pasará en Palestina. O pobo palestino ao final vencerá. Estou seguro da vitoria do meu pobo.

"Os pobos teñen que estar unidos ante esa barbaridade. Non estamos sós, hai un apoio continuo co pobo palestino. É o espírito de solidariedade entre os pobos"

Como recibes as mostras de solidariedade que con Palestina?

Temos moita solidariedade a nivel internacional. Isto é moi necesario porque dá moito apoio moral á nosa xente. A solidariedade é necesaria. O luns vai haber concentracións en 34 vilas galegas. 

Os pobos teñen que estar unidos ante esa barbaridade. Non estamos sós, hai un apoio continuo co pobo palestino. É o espírito de solidariedade entre os pobos. Porque o que hoxe afecta a Palestina mañá pode afectar a calquera pobo do mundo. Xa vimos a barbaridade do colonialismo en África

"A cuestión non é Hamás, nin Al-Fatah, nin a Fronte Popular. A cuestión é que estamos a sufrir unha limpeza étnica. A realidade é que nós, os palestinos, estamos moi unidos"

Nos últimos dous anos en ocasións inténtase vender a idea de que o conflito non se establece entre Israel e o pobo palestino, senón entre Israel e Hamás? Que se busca con esta identificación? Onde queda o resto do pobo palestino e as restantes organizacións políticas?

O que fala só de Hamás é porque está interesado en criminalizar a loita do pobo palestino. A resistencia non é só Hamas, senón que é de todos os partidos políticos palestinos que teñen brazo armado. Pero o que criminaliza o pobo palestino pola resistencia de Hamás é porque ten intereses niso. 

Polo tanto, a cuestión non é Hamás, nin Al-Fatah, nin a Fronte Popular. A cuestión é que estamos a sufrir unha limpeza étnica. A realidade é que nós, os palestinos, estamos moi unidos. 

Hamás gañou as eleccións libremente e limpamente en Cisxordania e en Gaza. Porén, de seguido Occidente empezou a dicir que "isto foi fraude, isto non é democracia". Seica o señor Borrell coñece a democracia máis que nós. Pero hai que respectar a madurez do meu pobo. O meu pobo elixiu a Hamás e polo tanto Hamás ten dereito a gobernar Gaza e Cisxordania.

"Imos conseguir ter un Estado democrático, progresista e laico, desde o río ata o mar, do río Xordán ao Mediterráneo. Pode ser dentro de 10 anos de 20 anos ou máis alá, pero a loita continuará e Palestina vencerá"

Como podería mellorar a curto prazo a situación do pobo palestino? Cómpre un posicionamento máis claro por parte dos países árabes?

O que necesitamos agora mesmo é continuar coa primeira fase do alto o fogo e deixar á xente de Gaza que poida comer. Queren que o meu pobo morra. Como non puideron militarmente, o que queren asasinar o pobo palestino é a través da fame e a través da sede. Levamos máis de catorce días sen recibir ningún camión de axuda

En canto aos gobernos árabes, hai dous tipos: uns subordinados a Estados Unidos, ao imperialismo, como Arabia Saudita ou os Emiratos Árabes, e hai outros países do eixo da resistencia que están a apoiar o pobo palestino, comezando polo Iemen. O Iemen dixo que non ía deixar pasar ningún barco israelí polo Mar Vermello ata que se abran os pasos fronteirizos e pase a axuda humanitaria, alimentos e medicina.

Queres engadir algo máis?

En primeiro lugar, agradézoche esta entrevista. E quero dicirlle a todo o mundo que imos vencer. Imos conseguir ter un Estado democrático, progresista, laico, desde o río ata o mar, é dicir, da auga á auga, do río Xordán ao Mediterráneo. Pode ser dentro de 10 anos de 20 anos ou máis alá, pero a loita continuará e Palestina vencerá".