15 días despois de ser interceptada en augas internacionais por militares israelís, partiu de novo dende Marmaris (Turquía) co obxectivo de rachar o bloqueo que sofre a poboación palestina
Este xoves partiu dende o porto de Marmaris, en Turquía, a Flotilla Global Sumud en dirección a Gaza. A misión, que conta co reforzo das novas incorporacións de barcos gregos e turcos, reinicia a súa travesía 15 días despois de que fose interceptada en augas internacional por militares israelís, que secuestraron a parte dos seus integrantes, dous dos cales -Thiago Ávila e Saif Abu Keshek- permanecen nunha prisión en Israel. A Flotilla, composta por 54 barcos con case 500 participantes de 45 países, inicia agora a súa última etapa cara a Gaza "co obxectivo de rachar o bloqueo imposto".
Nela viaxan oito galegos e galegas, unha máis que na partida inicial, xa que se incorporou Amaia Pérez-Izaguirre Urquizu, sanitaria galega que forma parte do equipo médico da flotilla. Únese a outros e outras activistas do país, como Sandra Garrido, avogada e activista que xa formou parte da Flotilla no 2025; Alberte Pagán, cineasta e documentalista galego que participou na Marcha a Gaza por terra no 2025; e Xurxo Porritt Lueiro, enfermeiro xubilado, ex-portavoz da Plataforma pola Defensa da Sanidade Pública no Condado e membro de O Condado con Palestina.
Na misión viaxan oito activistas de Galicia, coa incorporación dunha sanitaria. A organización chama á sociedade galega a mobilizarse: "se atacan á flotilla, atoparán unha onda de resistencia global"
A voceira a bordo dos barcos, Sandra Garrido, afirma que “o silencio dos gobernos tras o ataque á Flotilla é unha mostra do silenciamento do xenocidio que se comete en Gaza dende hai 78 anos. Imos para que se vexa o que sucede en Palestina”. A motivación e os folgos están intactos a pesar dos ataques ilegais e as presións sufridas. Como afirma Xurxo Porrit: “Venceremos nós, venceremos nós, algún día venceremos“; sempre coa Palestina e a súa loita no centro.
A voceira a bordo dos barcos, Sandra Garrido, afirma que “o silencio dos gobernos tras o ataque á Flotilla é unha mostra do silenciamento do xenocidio que se comete en Gaza dende hai 78 anos. Imos para que se vexa o que sucede en Palestina"
A flotilla denuncia que o xenocidio israelí "continúa cruelmente coa aceptación e pasividade dos organismos internacionais" e sinala que "a terrible e silenciada situación que sofre o pobo palestino, mesmo despois do falso cesamento do fogo, fai cada vez máis urxente establecer un corredor humanitario". O obxectivo é entregar alimentos e axuda a nenas, nenos e familias palestinas "que continúan vivindo baixo a brutal ocupación israelí".
En paralelo á saída marítima, un convoi terrestre atópase avanzando no norte de África. Conformado por decenas de camións e centos de participantes de máis de 30 países, esta misión terrestre avanza por Libia cara ao cruzamento fronteirizo de Rafah.
Global Sumud Galiza sinala que permanece "atenta ao avance da flotilla" e indica que "no caso de ataques ou intercepcións, activaranse todas as medidas de acción e presión necesarias para exixir a seguridade e a liberdade das persoas participantes"
Global Sumud Galiza sinala que permanece "atenta ao avance da flotilla" e indica que "no caso de ataques ou intercepcións, activaranse todas as medidas de acción e presión necesarias para exixir a seguridade e a liberdade das persoas participantes, demandar a continuidade da misión e denunciar a complicidade global que sostén o xenocidio contra o pobo palestino".
A organización chama a toda a sociedade galega e internacional a mobilizarse en apoio desta misión e a sumarse á rede de acción: "se atacan á flotilla, atoparán unha onda de resistencia global: inmediata, organizada e visíbel. Porque Palestina non está soa. Porque asúa loita tamén é a nosa", destacan dende Global Sumud Galiza.
A organización subliña que a lexislación internacional "avala e debe garantir" o avance desta misión humanitaria, recoñecendo o dereito á liberdade de navegación e ao paso humanitario segundo a Convención das Nacións Unidas sobre o Dereito do Mar, as Convencións de Xenebra e o Manual de San Remo. Todas as persoas delegadas son civís protexidas pola Cuarta Convención de Xenebra, con dereito a trato humano e garantías
legais, engaden.
