A alcaldesa de Boimorto, María Jesús Novo, do Partido Popular, recibiu a vacina contra o coronavirus na residencia de anciáns municipal deste pequeno concello do interior da provincia da Coruña, segundo adiantou eldiario.es e puido confirmar Praza.gal.
A Xunta di que "comprobará a listaxe que enviou á residencia" coas persoas que debían vacinarse
A alcaldesa foi vacinada nesta primeira fase do proceso, que inclúe persoal e usuarios dos centros de maiores, así como profesionais sanitarios na primeira liña contra a COVID. Queda por ver se a rexedora fora incluída na listaxe enviada pola Xunta, que asegura que comprobará ese documento. Mentres, o PP da Coruña xa propuxo a apertura dun expediente disciplinario que podería levar á súa expulsión, ademais de propoñer a suspensión cautelar da súa militancia.
A inoculación do fármaco á alcaldesa era un rumor que circulaba desde hai xa varios días en Boimorto, segundo aseguran fontes do consistorio a este diario, "mesmo entre cargos locais do Partido Popular". A confirmación chega agora, xusto cando a administración da vacina por parte dalgúns cargos públicos noutros lugares do Estado, saltando a orde de prioridade prevista, ergueu a polémica e o debate político.
Precisamente, o presidente da Xunta, Alberto Núñez Feijóo, preguntado a semana pasada sobre a vacinación de alcaldes nalgúns municipios, respondeu na rolda de prensa posterior ao Consello que o "responsable e proporcional" sería, nestes casos, "presentar a renuncia ao cargo".
"Como mebro dun goberno, ou alcalde, ou concelleiro ou un director xeral, se non está dentro do protocolo previamente pactado, non pode vacinarse", dixera Feijóo, que chegar a asegurar que os políticos deberían ser "os últimos" en recibir o fármaco. Consultada a Consellería de Sanidade sobre o caso de Boimorto, asegura que "a Xunta comprobará a listaxe que enviou á residencia".
Feijóo asegurou a semana pasada que o "responsable e proporcional" para os alcaldes que se vacinan antes de tempo sería "presentar a renuncia ao cargo"
A residencia de Boimorto é a única de Galicia de xestión directa municipal e ten algo máis de 30 usuarios. Segundo declaracións recollidas por eldiario.es, María Jesús Novo xustifica a súa vacinación por ser "xefa de persoal" dun centro que depende do Concello, aínda que non ten ningún tipo de relación sanitaria e a residencia conta con dirección propia, e porque de non ter recibido a dose "había que tirala".
"Teño unha relación laboral porque vou todos os días por alí", declarou a alcaldesa, que non ten formación sanitaria e conta con dedicación exclusiva no Concello. Segundo fontes de familiares de usuarios do centro --sen ningún caso de COVID--, os residentes recibiron xa a segunda dose da vacina a pasada semana, pola que a inoculación á rexedora vén xa de hai tempo. Concretamente, recibiu a primeira dose no primeiro día da campaña de vacinación, hai un mes.
Coñecida a notica, desde o BNG, Xosé Luís Rivas, Mini, deputado e concelleiro en Boimorto, onde foi alcalde, cre que "non é de recibo" que a alcaldesa aproveitase a primeira quenda de vacinación para recibir o fármaco. "É un escándalo que isto suceda cando hai profesionais de axuda a domicilio, por exemplo, que aínda non recibiron a vacina, algo que xa fora reclamado polo Bloque", di en conversa con Praza.gal.
"É un escándalo, algo moi grave e inxustificable; non é de recibo", di Xosé Luís Rivas, deputado do BNG e concelleiro en Boimorto
Así, Rivas rexistoru xa unha iniciativa no Parlamento pedindo explicacións á Xunta e a Feijóo sobre un feito que cualifica de “moi grave e inxustificable” e sobre que solicita que se "diriman responsabilidades". "Cómpre lembrar que o propio presidente asegurou na última sesión plenaria no Parlamento que non existía ningún alcalde do PP que se vacinase sen dereito", dixo.
![](https://praza.gal/storage/uploads/201229-vacinavilagarcia-1-ea831b8.jpeg)
“Temos unha poboación moi envellecida, persoal do Servizo de Axuda no Fogar e moitas persoas dependentes que aínda non recibiron a vacina”, asegurou a Sandra Sánchez, portavoz local do PSOE en Boimorto, municipio cuns 2.000 habitantes, onde máis dun terzo superan os 64 anos de idade.
Precisamente, no PSdeG, o seu vicesecretario xeral, Pablo Arangüena, urxiu a Feijóo a que dea "explicacións" e a que "resolva esta situación antes da súa xuntanza co presidente do Goberno", Pedro Sánchez, porque "non pode haber sombras de sospeita sobre como se está desenvolvendo o proceso de vacinación en Galicia.
Arangüena lembra que o propio Feijóo tratou de restar importancia aos episodios irregulares de vacinación contra a COVID en Pontevedra ou Burela "alegando que non eran alcaldes do PP”. “Que tome medidas xa. Por exemplaridade e por xustiza social”, esixiu.
Pola súa banda, o deputado galego de Unidas Podemos no Congreso, Antón Gómez-Reino, exixe a "dimisión inmediata" da alcaldesa, da que reclama "desculpas públicas por ter empregado o seu cargo público para pasar por diante da xente maior do noso país ou do noso persoal sanitario que leva meses en primeira fila loitando contra o virus".
Gómez-Reino pregúntalle, ademais, a Feijóo "se hai máis responsables políticos ou cargos públicos que teñan pasado por diante dos maiores ou do persoal sanitario".