A crise de máis dunha década do PP de Vigo irrompe na campaña de Rueda

Rueda na presentación hai un ano da candidatura do PPdeG en Vigo, encabezada por Marta Fernández-Tapias © PPdeG

Hemeroteca

A presidenta do PP vigués, Marta Fernández-Tapias, admite que tras o 18F abrirá "unha nova etapa" despois de que a portavoz local do PSOE asegurase que vai deixar a política

Apenas 12 horas despois de iniciada a campaña electoral a Rueda estouráballe a primeira crise desta carreira ás urnas. Contra o mediodía deste venres Faro de Vigo facíase eco dunhas declaracións da portavoz local do PSOE, Yolanda Aguiar, asegurando que a presidenta do PP na cidade, Marta Fernández-Tapias, persoa de confianza de Rueda e candidata nas municipais do pasado maio, ten pensado deixar a política tras as eleccións galegas. Dúas horas e media despois a propia Fernández-Tapias confirmaba que "efectivamente" abrirá "unha nova etapa" tras o 18F.

Rueda e Marta Fernández-Tapias nunha imaxe de arquivo CC-BY-SA Xunta de Galicia

As sucesivas vitorias esmagadoras en Vigo de Abel Caballero, principal obstáculo político en Galicia primeiro de Feijóo e despois de Rueda, veñen retroalimentando a crise interna do PP na cidade. O último intento de superala foi impulsado polo propio Rueda, que apostou persoalmente por Marta Fernández-tapias, a súa directora xeral de Administración Local entre 2016 e 2020. Ese ano situouna como delegada da Xunta en Vigo e un ano máis tarde apoiouna como presidenta local do partido. 

Fernández-Tapias foi a candidata nas municipais do pasado maio, nas que o PP, con apenas o 18,5% dos votos, pasou de 4 a 5 escanos, fronte aos 19 de Caballero. Tras ese novo fracaso popular na principal cidade galega Rueda xa non foi quen de darlle a presidencia da Deputación de Pontevedra que si logrou o PP a nivel provincial e Fernández-Tapias tivo que conformarse cunha vicepresidencia centrada en Vigo. Un cargo co que tampouco vén sendo quen de lograr maior visibilidade para o PP na cidade. 

Neste contexto, este venres as declaracións da portavoz socialista asegurando que Fernández-Tapias deixará a primeira liña política foron respondidas inicialmente co silencio por parte do partido ata que a propia implicada publicou unha mensaxe na súa conta de X, antigo Twitter: "Moi mal lle ten que ir ao PSOE para isto. Do que toca falar é do futuro de Galicia. Non respectan nada nin a ninguén. Aposto pola miña vida persoal e iso correspóndeme a min. Efectivamente, abrirei unha nova etapa tras gañar as autonómicas ao PSOE en Vigo e con Rueda de presidente".

A dúas semanas das eleccións nas que xoga o seu futuro Rueda ve como Vigo segue sendo un problema para o PPdeG.

Despece

  • Feijóo insiste en virar a campaña ao debate estatal e insta a elixir «entre o modelo de Sánchez e o de Galicia»

    Núñez Feijóo, xunto a Elena Candia e a conselleira Ethel Vázquez, en Pedrafita © PP

    O presidente do PP, Alberto Núñez Feijóo, insiste en virar a campaña das eleccións galegas cara ao debate estatal e insta a decidir o 18F "entre o modelo de Sánchez e o de Galicia". O ex-presidente da Xunta rexeitou durante un acto en Monforte de Lemos "exportar" ao país o modelo político de "minorías radicais" que, segundo el, goberna en España. 

    "Imos decidir entre o modelo de Pedro Sánchez e o modelo de Galicia. E Galicia teno claro: Galicia ten que ser Galicia", dixo nun mitin-comida no que pediu o voto para Alfonso Rueda e para un goberno "estable" e sen "liortas" internas, algo que ocorrería, cre el, se as esquerdas suman maioría. 

    Ademais, Feijóo cre que "a Galicia non lle interesa importar modelos que non funcionan", en referencia a un "multi ou bipartito" que, advertiu, "vai repoñer os impostos que o PP baixou". 

    Horas antes, desde Pedrafita do Cebreiro, o líder dos populares cualificou de "inaceptable" a situación das infraestruturas en Galicia e, en referencia ao viaduto da A-6, inoperativo por obras tras a caída de 2022, advertiu que a comunidade "leva dous anos e medio sen a súa principal arteria de conexión co resto de España". "Sería isto admisible no acceso a Madrid ou a Catalunya?", preguntouse, e dixo estar convencido de que a Generalitat non aceptaría unha situación semellante. 

  • David Reinero

    David Reinero

    Xornalista de datos máis que de anécdotas, forma parte da redacción de Praza Pública desde 2016 tras facer de todo en El País, Xornal de Galicia e Atlántico Diario

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza