O PP fai que 16 persoas renuncien a ser edís en Rodeiro para que o delegado da Xunta en Pontevedra presida a Deputación

Luis López, á esquerda, con Marta Fernández-Tapias CC-BY-SA Xunta de Galicia

Hemeroteca

Luis López, décimo suplente popular nese concello, imponse á delegada da Xunta e candidata en Vigo, Marta Fernández-Tapias, e faise coa Deputación, pero aboca a unha nova remuda na Xunta

Luis López, delegado da Xunta en Pontevedra e presidente do PP na provincia, cargo ao que foi ascendido hai un ano cando Rueda se fixo coa presidencia do partido en Galicia tras a marcha de Feijóo, será o novo presidente da Deputación de Pontevedra. Pero el non era a primeira opción dos populares para substituír a socialista Carmela Silva á fronte da institución tras lograr a maioría absoluta a nivel provincial nas municipais do 28 de maio. Así o evidencia o feito de que concorreu a esas eleccións de xeito simbólico, como décimo e último suplente na lista do PP por Rodeiro. 

Así que para que este sábado López poida tomar posesión como concelleiro, imprescindible para ser elixido dentro dunhas semanas presidente da Deputación, foi necesario que 16 persoas renunciasen a ser edís, xa que en Rodeiro o PP só logrou 5 concelleiros.

Candidatura do PP en Rodeiro o pasado 28M que obtivo catro edís, con Luis López como décimo suplente CC-BY-SA Praza Pública

López farase coa presidencia da Deputación de Pontevedra, unindo novamente o cargo coa presidencia provincial do partido, como ocorría na época de Rafael Louzán, tras impoñerse nos debates internos á delegada da Xunta e candidata en Vigo, Marta Fernández-Tapias, que o 28M só logrou aumentar o peso popular nesa cidade de 4 a 5 edís.

A elección de López como presidente da Deputación obrígao a deixar a delegación da Xunta, o que aboca a unha nova remuda na administración autonómica que se suma á crise de goberno aberta por Feijóo ao levarse con el a Madrid a Francisco Conde e Rosa Quintana. 

Luis López nunha imaxe de arquivo con Agustín Hernández, quen no seu momento se fixo coa alcaldía de Santiago malia ser o último na lista electoral do PP CC-BY-SA Xunta de Galicia

A operación de Rodeiro lembra a chegada en 2014 á alcaldía de Santiago de Agustín Hernández, 25 e último da lista do PP nas anteriores municipais

A operación para que López se faga coa Deputación de Pontevedra malia ser o último suplente da lista popular en Rodeiro lembra ao ocorrido en 2014 en Santiago cando tras as dimisións de Gerardo Conde Roa e Ángel Currás a alcaldía foi parar ao daquela conselleiro Agustín Hernández, número 25 e último da lista do PP na capital galega nas anteriores municipais.

  • David Reinero

    David Reinero

    Xornalista de datos máis que de anécdotas, forma parte da redacción de Praza Pública desde 2016 tras facer de todo en El País, Xornal de Galicia e Atlántico Diario

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza